Narendra Modi Baramati Visit – बारामतीच्या राजकारणात पवार विरुद्ध भाजप असा संघर्ष गेल्या काही वर्षांत अधिक तीव्र होत असतानाच आता त्याच बारामतीत एक वेगळे राजकीय चित्र पाहायला मिळणार आहे. ज्येष्ठ नेते शरद पवार यांनी स्वतः पंतप्रधान नरेंद्र मोदी यांना बारामतीत येण्याचे निमंत्रण दिले आणि आता २४ ऑक्टोबर रोजी मोदी बारामतीत येणार आहेत. विद्या प्रतिष्ठानच्या परिसरात उभारण्यात आलेल्या ‘प्रेरणास्थळा’चे उद्घाटन मोदी यांच्या हस्ते होणार आहे.

या दौऱ्यात एआय संस्थेची पाहणी आणि सादरीकरणही होण्याची शक्यता आहे. मोदी यांच्या या बारामती भेटीला केवळ एका उद्घाटनाचा कार्यक्रम म्हणून न पाहता त्यामागील राजकीय पार्श्वभूमीकडेही पाहिले जात आहे. कारण गेल्या काही वर्षांत ‘मिशन बारामती’च्या माध्यमातून भाजपने पवारांच्या बालेकिल्ल्यात राजकीय पाय रोवण्याचे प्रयत्न केले आहेत. २०१९च्या लोकसभा निवडणुकीपासून भाजपने बारामतीकडे विशेष लक्ष केंद्रित केले.

त्यानंतर केंद्रीय मंत्र्यांचे दौरे, संघटनात्मक बांधणी आणि विविध राजकीय कार्यक्रमांच्या माध्यमातून भाजपने बारामतीच्या राजकारणात आपली उपस्थिती वाढवण्याचा प्रयत्न केला. २०१५मध्येही मोदी-पवार एकाच व्यासपीठावर पंतप्रधान झाल्यानंतर नरेंद्र मोदी यांनी २०१५मध्ये बारामतीला भेट दिली होती. त्या वेळी शरद पवार यांच्या संस्थात्मक कामाचे मोदी यांनी कौतुक केले होते.

मोदींच्या महाराष्ट्रातील सुरुवातीच्या दौऱ्यांपैकी बारामतीचा हा दौरा विशेष चर्चेत राहिला होता. त्यानंतरच्या काळात मात्र राष्ट्रीय राजकारणात मोदी आणि पवार यांच्यातील राजकीय भूमिका अनेक मुद्द्यांवर परस्परविरोधी राहिल्या. महाराष्ट्राच्या राजकारणातील बदलत्या समीकरणांमध्ये पवार विरुद्ध भाजप हा संघर्षही प्रकर्षाने पुढे आला. बारामतीमध्येही या संघर्षाचे पडसाद उमटले.

‘मिशन बारामती’पासून पवारांच्या निमंत्रणापर्यंत
भाजपने २०१९पासून बारामती लोकसभा मतदारसंघावर विशेष लक्ष केंद्रित केले. २०२२मध्ये तत्कालीन केंद्रीय अर्थमंत्री निर्मला सीतारामन यांच्यावर बारामती लोकसभा मतदारसंघाची जबाबदारी देण्यात आली होती. भाजपच्या या प्रयत्नांमागे पवार कुटुंबाच्या राजकीय प्रभावाला आव्हान देण्याची रणनीती असल्याचे त्या वेळी राजकीय विश्लेषण करण्यात आले होते.

‘प्रेरणास्थळा’चे मोदींच्या हस्ते उद्घाटन
विद्या प्रतिष्ठानच्या परिसरात उभारण्यात आलेले ‘प्रेरणास्थळ’ भगवान गौतम बुद्ध यांच्या विचारांना समर्पित आहे. शांतता, समता आणि मानवतेचा संदेश देण्याचा उद्देश या माध्यमातून मांडण्यात आला आहे. विविध महापुरुषांच्या कार्याला येथे स्थान देण्यात आले आहे.पवार यांनी यापूर्वीच मोदी यांच्या उपस्थितीत या कार्यक्रमाचे नियोजन असल्याची माहिती दिली होती. ऑक्टोबरमध्ये मोदी बारामतीत येणार असल्याचे त्यांनी सांगितले होते. त्यानंतर आता २४ ऑक्टोबरची तारीख निश्चित झाली आहे.

एआयच्या माध्यमातून बारामतीचा नवा चेहरा
मोदींच्या दौऱ्यात विद्या प्रतिष्ठानमधील कृत्रिम बुद्धिमत्ता अर्थात एआयशी संबंधित उपक्रमही महत्त्वाचा ठरणार आहे. पवार यांनी अलीकडेच विद्या प्रतिष्ठानच्या मुख्यालयाला भेट देऊन या उपक्रमांचा आढावा घेतला. यावेळी एआय रोबोटने पवारांचे स्वागत केले आणि त्यांच्यासमोर रोबोटचे प्रात्यक्षिकही सादर करण्यात आले.