Maharashtra Politics : राज्यात विधान परिषद निवडणुकांची रणधुमाळी सुरू असतानाच महाविकास आघाडीमध्येही मतभेद समोर येत आहेत. पुणे पदवीधर मतदारसंघातील निवडणुकीवरून ठाकरे गट आणि राष्ट्रवादी काँग्रेसच्या शरद पवार गटामध्ये वाद निर्माण झाला आहे. प्रचार साहित्यावर उद्धव ठाकरे आणि आदित्य ठाकरे यांचे फोटो वापरण्यावरून ठाकरे गटाने आक्षेप घेतला आहे.

राज्यात विधान परिषदेच्या पाच मतदारसंघांसाठी निवडणूक होत आहे. यामध्ये पुणे पदवीधर, पुणे शिक्षक, छत्रपती संभाजीनगर पदवीधर, अमरावती शिक्षक आणि नागपूर मतदारसंघाचा समावेश आहे. यापैकी पुणे पदवीधर मतदारसंघातील लढतीकडे विशेष लक्ष लागले आहे.

पुणे पदवीधर मतदारसंघातून राष्ट्रवादी काँग्रेस शरदचंद्र पवार पक्षाने हर्षदा देशमुख यांना उमेदवारी दिली आहे. तर शिवसेना ठाकरे गटाकडून सुनील मोदी निवडणुकीच्या रिंगणात आहेत. त्यामुळे महाविकास आघाडीतील दोन्ही पक्षांचे उमेदवार एकमेकांसमोर आले आहेत.

याच पार्श्वभूमीवर प्रचार साहित्यावरून वाद निर्माण झाला आहे. राष्ट्रवादी काँग्रेस शरदचंद्र पवार पक्षाच्या उमेदवाराच्या प्रचारात उद्धव ठाकरे आणि आदित्य ठाकरे यांचे फोटो वापरण्यात आल्याचा ठाकरे गटाचा आक्षेप आहे. ठाकरे गटाचे नेते विनायक राऊत यांनी यावरून शरद पवार गटाला थेट इशारा दिला आहे.

उद्धव ठाकरे आणि मशाल चिन्हाचा वापर तातडीने थांबवा, अन्यथा कायदेशीर कारवाई करू, असा इशारा विनायक राऊत यांनी दिल्याची माहिती आहे. त्यामुळे पुणे पदवीधर मतदारसंघातील निवडणुकीमुळे महाविकास आघाडीतील मतभेद आणखी वाढण्याची शक्यता आहे.

दरम्यान, पुणे शिक्षक मतदारसंघावरून महायुतीमध्येही नाराजी असल्याचे बोलले जात आहे. शिवसेना शिंदे गटाचे मंगेश चिवटे या मतदारसंघातून निवडणूक लढवण्यासाठी इच्छुक होते. त्यांनी उमेदवारी अर्जही दाखल केला होता. मात्र ही जागा महायुतीमध्ये भाजपच्या वाट्याला गेल्याने भाजपने आपला उमेदवार दिला. त्यानंतर उमेदवारी अर्ज मागे घेण्याच्या शेवटच्या दिवशी चिवटे यांनी आपला अर्ज मागे घेतला.