Mutha River Flood Alert – खडकवासला धरणसाखळीतील चारही धरणांमधील पाणीसाठा सोमवारी सायंकाळी ९०.०९ टक्क्यांवर पोहोचला. चारही धरणांमध्ये २६.२६ टीएमसी पाणीसाठा असून, तो गेल्या वर्षीच्या याच दिवसाच्या तुलनेत किंचित अधिक आहे. यंदा प्रथमच पानशेत धरण ९५.१४ टक्के भरल्याने सोमवारी सायंकाळपासून ६०० क्यूसेकने पाण्याचा विसर्ग सुरू झाला. खडकवासला धरणातून ४,७०८ क्यूसेक पाणी सोडण्यात येत असून,

एनएमआरबीसी कालव्यातून १,०५४ क्यूसेक आणि महापालिकेसाठी ६८० क्यूसेक पाणी सोडले जात आहे. खडकवासला आणि पानशेत धरणातून मिळून साडेपाच हजार क्यूसेक पाण्याचा विसर्ग सुरू आहे. सोमवारी सायंकाळी पाच वाजेपर्यंत खडकवासला येथे ८ मिमी, पानशेत येथे २२ मिमी, वरसगाव येथे १५ मिमी आणि टेमघर येथे १५ मिमी पाऊस पडला. चारही धरणांमध्ये मिळून ४६९ दशलक्ष घनफूट (एमसीएफटी) पाण्याची आवक सुरू आहे.

खडकवासला धरण पूर्ण क्षमतेने भरले असून त्यामध्ये १.९७ टीएमसी (१०० टक्के) पाणीसाठा आहे. पानशेत धरणात १०.१३ टीएमसी (९५.१४ टक्के), वरसगाव धरणात ११.३५ टीएमसी (८८.५५ टक्के) आणि टेमघर धरणात २.८० टीएमसी (७५.५७ टक्के) पाणीसाठा आहे. गेल्या वर्षी याच दिवशी चारही धरणांमध्ये २६.१४ टीएमसी (८९.६८ टक्के) पाणीसाठा होता.