पुणे: “जो शत बार पाठ कर कोई, छूटही बंदी महासुख होई,” या तुलसीदासांच्या उक्तीला सार्थ ठरवत पुणेस्थित श्री सालासर हनुमानचालिसा मंडळ गेल्या १८ वर्षांपासून महाशिवरात्रीपासून हनुमान जन्मोत्सवापर्यंत संगीतमय हनुमान चालिसा पाठाचा भव्य उपक्रम राबवत आहे. आचार्य श्री गोविंदेवगिरी महाराज यांच्या प्रेरणेतून सुरू झालेल्या या धार्मिक सोहळ्याला लहानांपासून थोरांपर्यंत सर्वांचा उत्स्फूर्त प्रतिसाद मिळतो. यंदा २६ फेब्रुवारी २०२५ रोजी महाशिवरात्रीपासून श्री भिकारदास मारुती मंदिरातून या उपक्रमाला सुरुवात झाली. भक्ती आणि जनजागृतीचा अनोखा संगम – दररोज रात्री ९:३० वाजता सुरू होणाऱ्या या पाठात ११ वेळा विविध चालींमध्ये हनुमान चालिसा म्हटली जाते, त्यानंतर हनुमानजींची आरती आणि मंत्रपुष्पांजलीने कार्यक्रमाची सांगता होते. पुण्यातील दगडूशेठ हलवाई मंदिर, सारसबाग गणपती मंदिर, शंकर महाराज मठ, भाऊसाहेब रंगारी मंदिर, आंबा माता मंदिर, रोकडोबा मंदिर यासह अनेक मंदिरे, सोसायट्या आणि सार्वजनिक ठिकाणी हा उपक्रम उत्साहात साजरा होतो. दररोज ४०० ते ६०० भक्त या सोहळ्यात सहभागी होतात. समाजातील प्रतिष्ठित व्यक्तीही या भक्तीमय वातावरणाचा हिस्सा बनतात. या ४५ दिवसांच्या उपक्रमाची सांगता हनुमान जन्मोत्सवाच्या दिवशी गुरुवार पेठेतील मुरलीधर मंदिरात सायंकाळी ५ ते १० या वेळेत भव्य होम-हवनाने होणार आहे. रक्तदान शिबिराचे १० वे वर्ष- मंडळातर्फे दरवर्षी रक्तदान शिबिराचे आयोजन केले जाते. यंदा दहावे भव्य रक्तदान शिबिर रामनवमीच्या निमित्ताने ३ ठिकाणी होणार आहे: जयराज भवन: पिसाळ पथ, गाडीखाना हॉस्पिटलजवळ, शुक्रवार पेठ, पुणे ४११००२ | सकाळी ८:०० ते सायंकाळी ५:०० सुदत्त संकुल: हिंगणे, साईनगर, दामोदर नगरजवळ, पुणे ५१ | सकाळी ८:०० ते दुपारी ३:०० कै. आनंदीबाई डोके उद्यान: अपर्णाताई डोके कार्यालयाशेजारी, एल्प्रो मॉलजवळ, चिंचवड | सकाळी ९:०० ते सायंकाळी ४:०० भक्तांना सहभागाचे आवाहन – मंडळाने अंतिम सात दिवसांच्या पठणात आणि होम-हवनात जास्तीत जास्त नागरिकांनी सहभाग घ्यावा, असे आवाहन केले आहे. “या धार्मिक कार्यात हातभार लावावा,” अशी विनंती मंडळाने भक्तांना केली आहे. संगीतमय हनुमान चालिसाच्या माध्यमातून युवकांमध्ये भक्तीचा प्रसार करणारा हा उपक्रम पुण्याच्या सांस्कृतिक वैभवात भर घालत आहे.
