Murlidhar Mohol – क्रीडा क्षेत्रातील यश हे केवळ मैदानापुरते मर्यादित नसून ते विद्यार्थ्यांमध्ये शिस्त, जिद्द आणि नेतृत्वगुण रुजवते. खेलो इंडिया यांसारख्या उपक्रमांमुळे आज ग्रामीण भागातील खेळाडूंना आंतरराष्ट्रीय व्यासपीठ मिळत असून, महाराष्ट्रात आधुनिक क्रीडा सुविधा व स्पोर्ट्स सायन्सच्या बळावर क्रीडा क्षेत्राचे उज्ज्वल भविष्य घडत आहे, असे प्रतिपादन केंद्रीय सहकार व नागरी विमान वाहतूक राज्यमंत्री मुरलीधर मोहोळ यांनी केले.

प्रोग्रेसिव्ह एज्युकेशन सोसायटीच्या मॉडर्न कला, विज्ञान व वाणिज्य महाविद्यालयात आयोजित वार्षिक क्रीडा पारितोषिक वितरण समारंभात ते बोलत होते. याप्रसंगी मोहोळ यांच्या हस्ते विविध क्रीडा प्रकारांत चमकलेल्या गुणवंत खेळाडूंचा गौरव करण्यात आला. कार्यक्रमात विश्वचषक विजेत्या भारतीय खो- खो संघाचा कर्णधार प्रतीक वाईकर आणि महाविद्यालयाचे माजी विद्यार्थी तथा स्थायी समिती अध्यक्ष श्रीनाथ भिमाले यांचा विशेष सत्कार झाला.

सातत्य आणि मेहनतीच्या जोरावर कोणतेही ध्येय गाठता येते, असा संदेश वाईकर यांनी दिला. आमदार सिद्धार्थ शिरोळे आणि महापौर मंजुषा नागपुरे यांनीही विद्यार्थ्यांना खेळाचे महत्त्व पटवून देत मोबाइलचा वापर कमी करून मैदानी खेळांवर लक्ष केंद्रित करण्याचे आवाहन केले. प्राचार्या डॉ. निवेदिता एकबोटे यांनी प्रास्ताविक केले, तर प्रा. डॉ. ज्योत्स्ना एकबोटे व प्रा. शामकांत देशमुख यांनी मार्गदर्शन केले. डॉ. वैजयंती जाधव यांनी सूत्रसंचालन केले.