Nepal Floods : सध्या नेपाळ मोठ्या निसर्गिक संकटाचा सामना करत आहे. अचानक आलेल्या महापुरामुळे मोठी जीवतहानी झाली आहे. महापुरामुळे इमारती, गावच्या गावं, रस्ते आणि पूल वाहून गेले आहेत. या पुरात आतापर्यंत ३९२ जणांचा मृत्यू झाला असून १२०० हून अधिक लोक बेपत्ता आहेत. त्यांचा शोध नेपाळ सरकारकडून युद्धपातळीवर सुरू आहे.

या घटनेनंतर २९० भारतीय नागरिकांशी संपर्क होऊ शकलेला नाही. त्यांचा शोध घेण्यासाठी बचाव पथकांकडून सातत्याने प्रयत्न सुरू आहेत. नेपाळमध्ये महाराष्ट्रातील नागरिक देखील अडकल्याची माहिती समोर आली आहे. या नागरिकांना पुन्हा महाराष्ट्रात आणण्यासाठी महाराष्ट्र सरकारच्या वतीने प्रयत्न केले जात आहेत.

नेपाळच्या दुर्घटनेत अडकलेल्या महाराष्ट्रातील पर्यटकांशी मंत्री गिरीश महाजनांनी संवाद साधला आहे. महापुरात महाराष्ट्रातील ११४ नागरिक अ़डकले आहेत, त्यापैकी ५३ नागरिक सुखरूप असून मानसरोवर परिसरात असल्याची माहिती समोर आली आहे.

नेपाळ सरकारकडून मोठा इशारा

नेपाळ सरकारच्या प्लॅनेट लॅब्स आणि लँडसॅटच्या उपग्रह छायाचित्रांच्या विश्लेषणाचा अहवाल समोर आला आहे. रसुवागढी सीमेपासून सुमारे १८ किलोमीटरवर ल्हेंदे नदीचा प्रवाह पूर्णपणे बंद झाला आहे. या अडथळ्यामुळे नदीच्या किनारी भागात तात्पुरत्या स्वरूपाची एक सरोवरसदृश जलराशी तयार झाली आहे. नैसर्गिक सरोवराचा बांध फुटल्यास खालच्या भागातील परिसरात अचानक भीषण पूर येण्याचा मोठा धोका निर्माण झाला असल्याचा मोठा इशारा दिला आहे.

डोनाल्ड ट्रम्प यांची मोठी घोषणा

नेपाळमध्ये उद्धभवलेल्या नैसर्गिक संकटाचा सामना करण्यासाठी भारतासह अनेक देश मदतीसाठी सरसावले आहेत. आता अमेरिकेचे राष्ट्रध्यक्ष डोनाल्ड ट्रम्प यांनी मोठी घोषणा केली आहे. ‘नेपाळमधील पूर अतिशय भयंकर असून आम्ही नेपाळमधील नेत्यांना फोन केला होता. आम्ही त्यांना मदतीविषयी विचारणा केली. त्यांना लागत असलेली मदत आम्ही करू असे ट्रम्प यांनी जाहीर केले आहे. भारत, अमेरिकेव्यतिरिक्त ब्रिटेन, वर्ल्ड बँकेनेही आधीच मदतीची घोषणा केली आहे. याशिवाय बॅालिवूड अभिनेता सोनू सूद मदतीसाठी पुढे सरसावला आहे.

Pune Nashik Railway: पुणे-नाशिक रेल्वेमार्ग बदलला पण सातबारा अडकला! शेतकऱ्यांची खरेदी-विक्री अन् कर्जाचे व्यवहार ठप्प