पुणे  – कौटुंबिक वादातून पतीचा खून करून त्याने गळफास घेऊन आत्महत्या केल्याचा बनाव पोलिसांन उघडकीस आणला. या प्रकरणी उत्तमनगर पोलिसांनी एका महिलेस अटक केली आहे.

रमेश भिसे (वय 44, रा. लांडगे निवास, उत्तमनगर, एनडीए रस्ता) असे खून झालेल्याचे नाव आहे. या प्रकरणी पत्नी नंदिनी (वय 40) हिला अटक करण्यात आली आहे. रमेश भिसे आणि त्याची पत्नी भाड्याने खोली घेऊन राहत होते. दोन दिवसांपूर्वी दोघांमध्ये वाद झाले होते.

भिसेला दारू पिण्याचे व्यसन आहे. तो पत्नीच्या चारित्र्याचा संशय घेत होता. तो काही कामधंदे करत नव्हता. मध्यरात्री नंदिनीने पती रमेश याचा नायलॉनच्या दोरीने गळा आवळून खून केला. त्यानंतर गळ्यात दोरी बांधून घरातील हुकाला अडकवली. पतीने आत्महत्या केल्याचा बनाव तिने रचला. पतीने आत्महत्या केल्याचे तिने मुलगा तसेच नातेवाईकांना सांगितले.

या घटनेची माहिती मिळाल्यानंतर परिमंडळ तीनच्या पोलीस उपायुक्त पौर्णिमा गायकवाड, सहाय्यक आयुक्त रूक्‍मिणी गलांडे, उत्तमनगर पोलीस ठाण्याचे वरिष्ठ पोलीस निरीक्षक सुनील जैतापूरकर, गुन्हे शाखेतील निरीक्षक अर्जुन बोत्रे यांनी घटनास्थळी भेट दिली. भिसेचा मृतदेह ससून रूग्णालयात शवविच्छेदनासाठी पाठविण्यात आला. शवविच्छेदनात भिसेचा गळा आवळून खून करण्यात आल्याचे उघडकीस आले. त्यानंतर पोलिसांनी पत्नी, मुलगा, नातेवाईकांची चौकशी केली. पती त्रास देत असल्याने ा खून केल्याची कबुली नंदिनीने दिली. नंदिनीला प्रथमवर्ग न्यायदंडाधिकारी जान्हवी केळकर यांनी 12 एप्रिलपर्यंत पोलीस कोठडीत ठेवण्याचे आदेश दिले. सहाय्यक निरीक्षक दादाराजे पवार तपास करत आहेत.