MSRTC Bus Service – इंदापूर तालुक्यातील वालचंदनगर ते भिगवण मार्गावर एसटी बससेवा सुरू झाल्याने परिसरातील विद्यार्थी, शेतकरी, नोकरदार, व्यापारी तसेच नागरिकांना मोठा दिलासा मिळाला आहे. या बससेवेचा शुभारंभ अनुष्का भरणे व स्वप्निल पाटील यांच्या हस्ते करण्यात आला. वालचंदनगर परिसरातील नागरिक व विद्यार्थ्यांना भिगवण येथे जाण्यासाठी नियमित सार्वजनिक वाहतूक सुविधा उपलब्ध नसल्याने अनेक अडचणींचा सामना करावा लागत होता.

त्यामुळे या मार्गावर एसटी बससेवा सुरू करण्याची मागणी नागरिकांनी पंचायत समिती सदस्य श्रीराज भरणे यांच्याकडे केली होती. नागरिकांच्या मागणीची दखल घेत भरणे यांनी संबंधित एसटी आगाराच्या अधिकाऱ्यांशी संपर्क साधून बससेवा सुरू करण्यासाठी पाठपुरावा केला. त्यांच्या प्रयत्नांना यश येऊन ही सेवा सुरू करण्यात आली. या मार्गावर एसटीच्या दिवसातून दोन फेऱ्या होणार आहेत.

पहिली बस सकाळी ९.४५ वाजता, तर दुसरी फेरी दुपारी ३.३० वाजता भिगवणहून वालचंदनगरच्या दिशेने रवाना होणार आहे. त्यामुळे शाळा-महाविद्यालयीन विद्यार्थ्यांसह कामानिमित्त भिगवणकडे जाणाऱ्या नागरिकांची मोठी सोय झाली आहे. बससेवा सुरू झाल्यामुळे खासगी वाहनांवर अवलंबून राहण्याची गरज कमी होणार असून, प्रवासाचा वेळ व खर्चही वाचणार आहे. या सुविधेबद्दल नागरिकांनी समाधान व्यक्त केले असून, बससेवा सुरू करण्यासाठी पुढाकार घेतल्याबद्दल भरणे यांचे आभार मानले.