Modi Maldives Visit: भारत आणि मालदीव यांच्यातील संबंधांना नवी उभारी देण्यासाठी पंतप्रधान नरेंद्र मोदी आणि मालदीवचे राष्ट्रपति मोहम्मद मुइज्जू यांच्यात शुक्रवारी माले येथे महत्त्वपूर्ण चर्चा झाली. यावेळी भारताने मालदीवला ४,८५० कोटी रुपये (सुमारे ५६५ दशलक्ष डॉलर) च्या ‘लाइन ऑफ क्रेडिट’ ची घोषणा केली. ही रक्कम मालदीवमधील पायाभूत सुविधा आणि विकास प्रकल्पांसाठी वापरली जाणार आहे. दोन्ही देशांनी मुक्त व्यापार करार (FTA) साठी चर्चा सुरू करण्याचा आणि द्विपक्षीय गुंतवणूक कराराला पुढे नेण्याचा निर्णय घेतला.

पंतप्रधान मोदी म्हणाले, “मालदीवचा सर्वात विश्वासू मित्र असल्याचा भारताला अभिमान आहे.” भारताच्या ‘नेबरहुड फर्स्ट’ आणि ‘महासागर’ (मॅरिटाइम अँड सिक्युरिटी अँड ग्रोथ फॉर ऑल इन द रिजन) धोरणात मालदीवचे महत्त्व अधोरेखित करताना त्यांनी हे वक्तव्य केले. गेल्या काही महिन्यांत मालदीवचा चीनकडे झुकाव आणि भारतीय सैन्य कर्मचाऱ्यांना हटवण्याच्या मागणीमुळे दोन्ही देशांमधील संबंधांमध्ये तणाव निर्माण झाला होता, त्यामुळे ही भेट विशेष महत्त्वाची ठरली.

भारताने मालदीवला ४,८५० कोटी रुपये (सुमारे ५६५ दशलक्ष डॉलर) ची ‘लाइन ऑफ क्रेडिट’ दिली म्हणजे भारत मालदीवला कर्जाच्या स्वरूपात ही रक्कम देणार असल्याचा निर्णय घेतला आहे. हे कर्ज मालदीवला रस्ते, पूल, बंदरे, वीज प्रकल्प यासारख्या पायाभूत सुविधा आणि विकास कामांसाठी वापरता येईल. यामुळे मालदीवची अर्थव्यवस्था मजबूत होईल आणि तिथल्या लोकांचे जीवनमान सुधारेल. भारताने हे कर्ज कमी व्याजदराने आणि सोप्या अटींसह दिले आहे, जेणेकरून मालदीवला परतफेड करणे सोपे जाईल. यामागे भारताचा उद्देश मालदीवशी मैत्री वाढवणे आणि त्यांना प्रगतीसाठी मदत करणे हा आहे.

संरक्षण आणि समुद्री सुरक्षेत सहकार्य वाढणार-

दोन्ही नेत्यांनी संरक्षण आणि समुद्री सुरक्षा क्षेत्रातील सहकार्य आणखी वाढवण्यावर सहमती दर्शवली. “संरक्षण आणि सुरक्षेतील आमचे सहकार्य परस्पर विश्वासाचे प्रतीक आहे. मालदीवच्या संरक्षण क्षमता वाढवण्यासाठी भारत नेहमीच साथ देईल,” असे मोदी यांनी स्पष्ट केले. मालदीवमध्ये चीनचा प्रभाव वाढत असताना भारत या क्षेत्रात आपली भूमिका मजबूत ठेवण्यास उत्सुक आहे.

पंतप्रधान मोदी शुक्रवारी मालदीवच्या दोन दिवसीय अधिकृत दौऱ्यावर माले येथे दाखल झाले. मालदीवच्या ६०व्या स्वातंत्र्यदिन समारंभात ते मुख्य पाहुणे म्हणून सहभागी होणार आहेत. माले विमानतळावर राष्ट्रपति मुइज्जू यांनी त्यांचे स्वागत केले, तर शालेय विद्यार्थ्यांनी पारंपरिक सांस्कृतिक कार्यक्रम सादर करत त्यांचा सत्कार केला. परराष्ट्र सचिव विक्रम मिस्री यांनी सांगितले की, नोव्हेंबर २०२३ मध्ये मुइज्जू राष्ट्रपति झाल्यानंतर ही पहिलीच अधिकृत राजकीय भेट आहे.

यूके दौऱ्यातही ऐतिहासिक करार –
यापूर्वी पंतप्रधान मोदी यांनी युनायटेड किंगडमचा दोन दिवसीय दौरा केला, जिथे भारत आणि यूके यांच्यात ऐतिहासिक व्यापार करार झाला. या करारामुळे ऑटोमोबाइल, कापड आणि स्पिरिट्ससह अनेक वस्तूंवरील आयात शुल्क कमी होणार असून, दोन्ही देशांमधील व्यापाराला चालना मिळेल.

मालदीवमधील चीनच्या वाढत्या प्रभावाच्या पार्श्वभूमीवर भारताने ‘लाइन ऑफ क्रेडिट’ आणि संरक्षण सहकार्याच्या माध्यमातून मालदीवशी संबंध दृढ करण्याचा प्रयत्न केला आहे. पंतप्रधान मोदींची ही भेट मालदीवसोबतच्या मैत्रीला नवे परिमाण देणारी ठरेल, अशी अपेक्षा आहे.