कोलकाता – मणिपुरात हिंसाचारामुळे कुकी आमदारांना प्रवास करणे भीतीचे वाटू लागल्याने 21 ऑगस्टपासून सुरू होणाऱ्या मणिपूर विधानसभेच्या अधिवेशनात बहुतांश कुकी व अन्य अदिवासी आमदार उपस्थित राहण्याची शक्यता कमी आहे, अशी माहिती या समाजातील काही प्रतिनिधींनी दिली आहे. मैतेई समुदायाच्या संघटनांनी मात्र अदिवासी कुकी आमदारांना अधिवेशनासाठी यायचे असेल तर त्यांच्यासाठी आम्ही सुरक्षेची हमी देतो, असे म्हटले आहे. मणिपूरमधील सध्याची कायदा आणि सुव्यवस्थेची परिस्थिती आणि सततचा हिंसाचार पाहता आगामी अधिवेशनाला उपस्थित राहणे माझ्याकडून शक्य होणार नाही, असे चुरचंदपूरचे भाजप आमदार एलएम खौटे म्हणाले. पीटीआयला दिलेल्या टेलिफोनिक मुलाखतीत त्यांनी ही माहिती दिली. खौटे म्हणाले, हिंसाचारामुळे आणि दहशतीच्या वातावरणामुळे सर्व कुकी-झोमी-हमार आमदारांना अधिवेशनात उपस्थित राहणे शक्य होणार नाही. 60 सदस्य संख्या असलेल्या मणिपूर विधानसभा सभागृहात भाजपचे सात, कुकी पीपल्स अलायन्सचे दोन आणि एक अपक्ष असे 10 कुकी-झोमी आमदार आहेत. कुकी पीपल्स अलायन्सचे अध्यक्ष टोंगमांग हाओकीप यांनी पीटीआयला सांगितले की, इंफाळला जाणे आमदारांसाठी सुरक्षित नाही. थॅनलॉनचे प्रतिनिधीत्व करणारे भाजपचे एक आमदार वुंगझागिन वाल्टे यांना तेथे वाईटरित्या मारहाण करण्यात आली असून ते अजूनही वैद्यकीय देखरेखीखाली आहेत, असे त्यांनी निदर्शनाला आणून दिले. राज्य सरकार आणि केंद्राकडून हमी मिळाल्यास आणि आमदारांच्या सुरक्षेसाठी पुरेशी पावले उचलली गेली तरच ही भीती दूर करता येईल, असेही ते म्हणाले. दरम्यान, कुकी इंपी मणिपूर, कुकी स्टुडंट्स ऑर्गनायझेशन, कुकी चीफ्स असोसिएशन आणि कुकी वुमन युनियन या कुकी संघटनांच्या नेत्यांनीही कुकी व अन्य अदिवासी आमदारांना इंफाळला जाण्यापासून दूर राहण्यास सांगितले आहे. नागा समुदायाच्या संघटनेनेही 10 नागा आमदारांना विधानसभेच्या अधिवेशनात उपस्थित न राहण्यास सांगितले आहे.
