Mitchell Starc Mehidy Hasan Miraz Heated Altercation Video Viral : डार्विन येथील मारारा क्रिकेट मैदानावर खेळल्या जात असलेल्या ऑस्ट्रेलिया विरुद्ध बांगलादेश पहिल्या कसोटी सामन्यात हाय-व्होल्टेज ड्रामा पाहायला मिळाला. दुसऱ्या दिवसाच्या अखेरच्या सत्रात ऑस्ट्रेलियन वेगवान गोलंदाज मिचेल स्टार्क (Mitchell Starc) आणि बांगलादेशचा अष्टपैलू मेहदी हसन मिराझ (Mehidy Hasan Miraz) यांच्यात मैदानावरच जोरदार शाब्दिक चकमक उडाली. वाद विकोपाला जात असल्याचे पाहून मैदानातील पंचांनी तात्काळ हस्तक्षेप करत परिस्थिती नियंत्रणात आणली. या घटनेचा व्हिडीओ सोशल मीडियावर प्रचंड व्हायरल होत आहे.

धाव घेण्याच्या रेषेवरून स्टार्कचा पारा चढला –

दुसऱ्या दिवसाच्या अखेरच्या सत्रात मिचेल स्टार्क गोलंदाजी करत असताना मिराझने त्याच्या चेंडूवर एक धाव घेतली. ही धाव घेताना मिराझ आपल्या फॉलोथ्रूच्या (Follow-through) भागातून धावल्याचा दावा करत स्टार्कने तीव्र नाराजी व्यक्त केली. मिराझने आपण जाणूनबुजून त्या दिशेने धाव घेतली नसल्याचे स्पष्ट केले, तरीही संतापलेल्या स्टार्कने आक्रमक होत त्याला “तुझ्याच जागेतून धाव घे,” असा दम भरला.

“Get off the wicket!”

Mitchell Starc and Mehidy Hassan Miraz had a heated exchange in #AUSvBAN: https://t.co/854LsTds7l pic.twitter.com/fTJtsn4px8

— cricket.com.au (@cricketcomau) August 14, 2026

कांगारू बॅकफूटवर; बांगलादेशकडून १५३ धावांची भक्कम आघाडी –

पहिल्या डावात ऑस्ट्रेलियन संघ अवघ्या १९८ धावांत गारद झाल्यानंतर गोलंदाजांवर बांगलादेशला रोखण्याचे मोठे दडपण होते. मात्र, बांगलादेशच्या फलंदाजांनी संयमी खेळ करत दुसऱ्या दिवसअखेर ६ बाद ३५१ धावांचा डोंगर उभारत १५३ धावांची भक्कम आघाडी मिळवली. ऑस्ट्रेलियाचा संघ बॅकफूटवर फेकल्यामुळे निर्माण झालेल्या याच दबावातून आणि निराशेपोटी स्टार्कने आपला राग मिराझवर काढल्याचे स्पष्ट दिसत होते.

हेही वाचा – Hardik Delhi Capitals : हार्दिक पंड्याची गुजरात नव्हे तर ‘या’ नव्या संघात होणार एन्ट्री; फ्रँचायझीच्या एका फोटोने उडवली खळबळ!

तिसऱ्या दिवशी पुन्हा मैदानात चकमकीची शक्यता –

दुसऱ्या दिवसाचा खेळ संपला तेव्हा मेहदी हसन मिराझ ७३ चेंडूंत ३ चौकारांसह ३२ धावांवर नाबाद होता, तर हसन महमूद ७६ चेंडूंत १३ धावांवर खेळत होता. आता तिसऱ्या दिवशी खेळ सुरू होताच मिराझ आणि स्टार्क पुन्हा एकदा आमनेसामने येणार आहेत. ऑस्ट्रेलिया दमदार पुनरागमन करून सामना वाचवणार की बांगलादेश ऐतिहासिक विजयाकडे कूच करणार, याकडे सर्वांचे लक्ष लागले आहे.