Mitchell Santner Post Match Reaction India vs New Zealand T20 Series : भारताविरुद्धची पाच सामन्यांची टी-२० मालिका २-३ अशा फरकाने निसटली असली, तरी शेवटच्या दोन्ही सामन्यांत ज्या प्रकारे न्यूझीलंडने खेळ केला, त्यावर कर्णधार मिचेल सँटनरने समाधान व्यक्त केले आहे. पाचव्या टी-२० लढतीत भारतावर ७ गडी राखून मिळवलेल्या दिमाखदार विजयानंतर सँटनरने रोखठोक प्रतिक्रिया दिली. सुरुवातीच्या दोन सामन्यांमधील महत्त्वाच्या क्षणांत झालेल्या चुका नडल्या, अन्यथा या मालिकेचा निकाल पूर्णपणे उलट लागला असता, असा दावा किवी कर्णधाराने केला आहे.

‘निकाल उलटा लागला असता’; सुरुवातीच्या चुकांची कबुली

सामन्यानंतर बोलताना मिचेल सँटनर म्हणाला, “आम्ही सुरुवातीच्या दोन सामन्यांवर नक्कीच विचार करू; ती मालिका अत्यंत चुरशीची ठरली. पहिल्या दोन सामन्यांमध्ये असे काही क्षण होते जिथे आम्ही सामना जिंकू शकलो असतो किंवा जिंकायला हवा होता. त्यामुळे मालिकेचा निकाल पूर्णपणे वेगळा लागू शकला असता. मात्र क्रिकेटच्या दृष्टीने या मालिकेतून आम्हाला खूप सकारात्मक गोष्टी मिळाल्या आहेत. फलंदाजी आणि गोलंदाजी दोन्ही आघाड्यांवर अखेरच्या दोन लढतींमध्ये खेळाडूंनी सर्वोत्तम कामगिरी केली.”

गोलंदाजीतील बदल अन् संघात उत्तम पर्याय –

गोलंदाजीतील सुधारणांबाबत बोलताना सँटनर म्हणाला की, गोलंदाजांनी टप्प्यात आणि लेन्थमध्ये उत्तम बदल केले; वाईड यॉर्कर्स आणि सरळ लेन्थ चेंडूंचा सुरेख वापर केला. व्यस्त वेळापत्रकामुळे खेळाडूंचे रोटेशन अपेक्षेपेक्षा जास्त झाले असले, तरी यामुळे नव्या खेळाडूंना संधी मिळाली. जे खेळाडू नियमित खेळत नाहीत, त्यांनीही लगेच मैदानात उतरून मॅचविनिंग खेळ दाखवून दिला, ज्यामुळे आगामी विश्वचषकाच्या दृष्टीने संघात उत्तम बेंच स्ट्रेंथ तयार झाली आहे.

Always playing in good spirit. Thanks India for a memorable series 🤝 https://t.co/cNGbY4TAjo

— BLACKCAPS (@BLACKCAPS) November 1, 2026

ग्लेन फिलिप्सचे तोंडभरून केले कौतुक –

मालिकेत ३४१ धावा कुटून नवा जागतिक विक्रम रचणाऱ्या ग्लेन फिलिप्सवर कर्णधार सँटनरने स्तुतीसुमने उधळली. “प्रत्येक सामन्यात सातत्य राखणे ही अत्यंत खास गोष्ट आहे. फिलिप्स सुरुवातीला थोडा वेळ घेतो आणि नंतर मैदानातील योग्य भागात मोठे फटके मारतो. प्रत्येक लढतीत अशी कामगिरी करून त्याने संघाला भक्कम स्थितीत आणले,” असे म्हणत सँटनरने त्याच्या फलंदाजीचे विशेष कौतुक केले.

हेही वाचा – Shreyas Iyer Statement : ‘आमचे क्षेत्ररक्षण सुस्त होते!’ मालिका जिंकूनही श्रेयस अय्यर नाराज; हॅमिल्टनमधील पराभवाचे सांगितले धक्कादायक कारण

मालिकेत चुरस; न्यूझीलंडचा शेवटच्या दोन सामन्यांत पलटवार

A full house at Seddon Park 😍 https://t.co/mDs5A133oh

— BLACKCAPS (@BLACKCAPS) November 1, 2026

या मालिकेत भारताने सुरुवातीचे तीनही सामने जिंकून ३-० अशी अजेय आघाडी घेतली होती. पहिले दोन सामने अत्यंत अटीतटीचे झाले, तर तिसऱ्या लढतीत भारताने एकतर्फी विजय मिळवला होता. मात्र, त्यानंतर किवींनी अविश्वसनीय पुनरागमन केले आणि चौथ्या तसेच पाचव्या सामन्यात भारताला कोणतीही संधी न देता सहज धूळ चारली. भारताने मालिका ३-२ ने जिंकली असली, तरी शेवटच्या दोन लढतींमध्ये न्यूझीलंडने संपूर्ण वर्चस्व गाजवले.