Mirra Andreeva Wins : रशियाच्या पोरीने टेनिस विश्वात रचला नवा इतिहास! ३४ वर्षांनंतर फ्रेंच ओपन जिंकणारी ठरली सर्वात तरुण खेळाडू
Mirra Andreeva Wins : मिरा अँड्रीव्हा ही गेल्या ३४ वर्षांतील फ्रेंच ओपन महिला एकेरीचे जेतेपद जिंकणारी सर्वात तरुण खेळाडू बनली आहे
Mirra Andreeva Wins French Open 2026 Women Singles Title : रशियाची अवघ्या १९ वर्षांची तरुण टेनिस स्टार मिरा अँड्रीव्हा (Mirra Andreeva) हिने फ्रेंच ओपन २०२६ च्या महिला एकेरीचे (महिला सिंगल्स) विजेतेपद पटकावून क्रीडा जगतात नवा इतिहास रचला आहे. शनिवारी खेळल्या गेलेल्या अटीतटीच्या अंतिम सामन्यात मिराने पोलंडच्या माजा चवालिनस्का हिचा ६-३, ६-२ असा थेट सेटमध्ये पराभव करत आपल्या कारकिर्दीतील पहिलेवहिले ग्रँड स्लॅम जेतेपद पटकावले. सुमारे दीड तास चाललेल्या या सामन्यात मिराने संपूर्ण वर्चस्व राखले.
३४ वर्षांपूर्वीचा मोडला रेकॉर्ड; रचला नवा इतिहास –
मिरा अँड्रीव्हा ही गेल्या ३४ वर्षांतील फ्रेंच ओपन महिला एकेरीचे जेतेपद जिंकणारी सर्वात तरुण खेळाडू बनली आहे. यापूर्वी १९९२ मध्ये मोनिका सेलेसने वयाच्या १८ व्या वर्षी हा पराक्रम केला होता. विशेष म्हणजे, २००५ नंतर जन्मलेली आणि ग्रँड स्लॅम जिंकणारी मिरा ही जगातील पहिलीच खेळाडू (महिला व पुरुष दोन्हीमध्ये) ठरली आहे.
MIRRA THE CHAMPION 🏆#RolandGarros pic.twitter.com/mbInya59hj
— Roland-Garros (@rolandgarros) June 6, 2026
युक्रेन युद्धामुळे रशियन खेळाडूंवर लागलेल्या निर्बंधांमुळे मिराला या स्पर्धेत तटस्थ खेळाडू म्हणून खेळावे लागले. तसेच तिला स्वतःच्या देशाचा झंडा वापरण्याची परवानगी नव्हती. उपांत्य सामन्यात तिने युक्रेनच्या मार्ता कोस्त्युकचा पराभव केला होता, ज्यानंतर कोस्त्युकने खेळभावनेच्या विपरीत मिराशी हस्तांदोलन (हात मिळवणे) करण्यास नकार दिला होता, ज्याची प्रचंड चर्चा झाली होती.
क्वालिफायर माजा चवालिनस्काची संधी हुकली –
Mirra Andreeva lifts the Suzanne-Lenglen trophy (twice 😅) #RolandGarros pic.twitter.com/rQ6d25IL9j
— Roland-Garros (@rolandgarros) June 6, 2026
दुसरीकडे, २४ वर्षांची पोलंडची खेळाडू माजा चवालिनस्का हिने क्वालिफायर म्हणून थेट फायनलपर्यंत मजल मारली होती. फ्रेंच ओपन जिंकणारी पहिली क्वालिफायर खेळाडू बनण्याची सुवर्णसंधी तिच्याकडे होती, मात्र मिराच्या वादळापुढे तिची डाळ शिजली नाही. माजाची ही केवळ तिसरीच ग्रँड स्लॅम स्पर्धा होती.
२०२३ च्या माद्रिद ओपनमध्ये वयाच्या १५ व्या वर्षी क्वार्टर फायनल गाठून टेनिस विश्वाला धक्का देणाऱ्या मिरा अँड्रीव्हाने आता क्ले कोर्टवर आपली बादशाही सिद्ध केली आहे.
