Pune MH61 : पुणेकरांच्या वाहनांशी जोडलेली ‘MH12’ ही ओळख आता नव्या टप्प्यावर पोहोचली आहे. पुणे प्रादेशिक परिवहन कार्यालयाने (RTO) चारचाकी वाहनांसाठी ‘MH61’ ही नवीन नोंदणी मालिका सुरू करण्यास मंजुरी दिली आहे. त्यामुळे आगामी काळात पुण्यातील नवीन चारचाकी वाहनांवर MH61 A 0001 अशा पद्धतीची नंबरप्लेट दिसणार आहे.

पुणे आरटीओमधील MH12 मालिकेची उपलब्धता संपल्याने हा निर्णय घेण्यात आला आहे. नवीन मालिका सुरू होताच वाहन नोंदणीच्या पहिल्याच दिवशी मोठी गर्दी होण्याची शक्यता आहे. पसंतीचा क्रमांक मिळवण्यासाठी वाहनधारकांचीही गर्दी होऊ शकते. ही परिस्थिती टाळण्यासाठी आगाऊ अर्ज स्वीकारले जाणार असून, पसंतीच्या क्रमांकासाठी लिलाव प्रक्रिया जाहीर केली जाणार आहे.

MH12 मालिका का संपली?

पुणे आरटीओमधील दुचाकी वाहनांची नोंदणी MH12 ZZ पर्यंत पोहोचली आहे. नियमानुसार दोन अक्षरांनंतर थेट तीन अक्षरांची मालिका म्हणजे MH12 AAA सुरू करता येत नाही. तसेच MH12 AAA 1234 अशा तीन अक्षरी मालिकेची नंबरप्लेट देण्याचीही तरतूद नाही. त्यामुळे MH12 पुढे सुरू ठेवण्याचा पर्याय उपलब्ध राहिला नाही.

पुण्याची MH12 ही ओळख कायम ठेवण्यासाठी ‘MH12 1A’ असा प्रस्तावही केंद्राकडे पाठवण्यात आला होता. खासदार आणि केंद्रीय राज्यमंत्री मुरलीधर मोहोळ यांनी केंद्रीय रस्ते वाहतूकमंत्री नितीन गडकरी यांच्याकडे याबाबत विनंती केली होती. मात्र, MH12 1A ऐवजी स्वतंत्र MH61 कोड देण्याचा पर्याय सोपा असल्याने त्याला मंजुरी देण्यात आली.

यानंतर MH61 हा कोड पुण्यासाठी निश्चित करण्यात आला आहे. त्यामुळे पुणेकरांसाठी MH12 नंतर आता MH61 ही नवी वाहन ओळख ठरणार आहे.