MCOCA Arrest – दुचाकीवरून येऊन महिलांच्या गळ्यातील सोनसाखळ्या हिसकावून पसार होणाऱ्या सराईत चेनस्नॅचरला पिंपरी-चिंचवड पोलिसांच्या गुन्हे शाखेने साथीदारासह बेड्या ठोकल्या. ‘मकोका’सह खुनाचा प्रयत्न आणि सोनसाखळी चोरीच्या गुन्ह्यांत आरोपी असलेल्या फिदा हुसैन मानुअली इराणी याला मुकेश अरुण नेटके याच्यासह अटक करण्यात आली. आरोपींकडून ३५ लाख ३३ हजार रुपये किमतीचे २७ तोळे सोन्याचे दागिने जप्त करण्यात आले.

या कारवाईमुळे पिंपरी-चिंचवड आणि पुणे शहरातील १५ सोनसाखळी चोरीचे गुन्हे उघडकीस आले. पोलीस उपायुक्‍त रोहिदास पवार यांनी दिलेल्‍या माहितीनुसार, पोलीस आयुक्त विनय कुमार चौबे यांच्या आदेशानुसार सोनसाखळी चोरट्यांविरोधात विशेष मोहीम राबविण्यात येत आहे. त्यानुसार गुन्हे शाखेच्या मालमत्ता गुन्हे विरोधी पथकाने निगडीतील एका सोनसाखळी चोरीचा तपास सुरू केला.

घटनास्थळापासून आरोपी गेल्याच्या मार्गावरील तब्बल ४०० ते ५०० सीसीटीव्ही कॅमेऱ्यांचे फुटेज तपासण्यात आले. तांत्रिक विश्लेषण आणि गोपनीय माहितीच्या आधारे आरोपींचा माग काढत पोलिसांनी देहूरोड परिसरातून फिदा इराणी आणि मुकेश नेटके यांना ताब्यात घेतले. फिदा इराणी (वय ३३, रा. पाटील इस्टेट, शिवाजीनगर) याच्यावर खुनाचा प्रयत्न आणि सोनसाखळी चोरीचे दहा पेक्षा अधिक गुन्हे दाखल आहेत.

रावेत पोलीस ठाण्याच्या एका गुन्ह्यात त्याच्यावर मकोकाअंतर्गत कारवाई झाली होती. तो या प्रकरणात फरार होता. मुकेश नेटके (वय ३८) याच्यावरही अमली पदार्थ बाळगल्याचा गुन्हा दाखल आहे. चौकशीत हिंजवडी, देहूरोड, तळेगाव दाभाडे, निगडी, रावेत, वाकड, एमआयडीसी भोसरी तसेच पुण्यातील खराडी आणि विश्रामबाग येथील एकूण १५ गुन्हे उघडकीस आले. तसेच यापूर्वीचे त्‍याच्‍यावर आणखी दहा गुन्‍हे दाखल आहेत.

तालीब बाबा इराणी आणि अली अब्बास शौकत इराणी या दोघांना ताब्यात घेऊन यवत पोलिसांच्या स्वाधीन करण्यात आले. दरम्यान, मालमत्ता गुन्हे विरोधी पथकाने २०२६ मध्ये आतापर्यंत ३२ सोनसाखळी चोरीचे गुन्हे उघडकीस आणून सुमारे ५० लाख ६३ हजार रुपये किमतीचे ४१ तोळे सोने हस्तगत केले आहे. वरिष्ठ पोलीस निरीक्षक संजय चव्हाण यांच्या नेतृत्वाखाली ही कारवाई करण्यात आली.