Maval Tourism – भारतीय स्वातंत्र्यदिनाला जोडून आलेल्या शनिवार-रविवारच्या सुट्ट्यांमुळे मावळ तालुक्यात पर्यटनाचा अक्षरशः बहर आला. शुक्रवार रात्रीपासूनच पुणे, पिंपरी-चिंचवड, मुंबई, ठाणे तसेच राज्याच्या विविध भागांतून पर्यटक मावळात दाखल झाले. मात्र पर्यटकांच्या वाढलेल्या संख्येमुळे तालुक्यातील प्रमुख रस्त्यांवर वाहतूक कोंडीची समस्या निर्माण झाली. लोणावळ्यात सकाळपासूनच भुशी धरण, टायगर पॉइंट, लायन्स पॉइंट आणि राजमाची परिसराकडे जाणाऱ्या मार्गांवर वाहनांच्या लांबच लांब रांगा लागल्या होत्या.

शहरातील मुख्य बाजारपेठा आणि रस्ते पर्यटकांनी गजबजून गेले होते. अनेक पर्यटकांनी हातात तिरंगा घेऊन निसर्गाच्या सान्निध्यात स्वातंत्र्यदिनाचा आनंद लुटला. तसेच कार्ला परिसरातही मोठी गर्दी झाली होती. कार्ला फाटा ते एकविरा आई मंदिर तसेच कार्ला फाटा ते भाजे मार्गावर वाहनांची संख्या मोठ्या प्रमाणात वाढली होती. लोणावळ्यावरून पवनानगरकडे जाणाऱ्या रस्त्यावरही दिवसभर वाहतूक संथ गतीने सुरू होती. सोमाटणे फाटा, तळेगाव, वडगाव आणि कामशेत परिसरातही वाहतूक कोंडी झाली.

पवनानगर परिसरात पर्यटकांची विशेष गर्दी होती. पवना धरण परिसरात शनिवार आणि रविवारी अनेक पर्यटकांनी मुक्काम केला. कामशेत ते पवनानगर, कामशेत ते उकसान धरण तसेच कान्हे फाटा ते टाकवे या मार्गांवरही वाहनांची वर्दळ वाढली होती. मावळातील लोहगड, विसापूर, तुंग आणि तिकोणा किल्ल्यांवरही हौशी पर्यटकांनी मोठी गर्दी केली. पर्यटनाबरोबरच धार्मिक स्थळांवरही भाविकांची गर्दी झाली.

घोरवडेश्वर, कुंडमळा, शिरगाव आणि भंडारा डोंगर येथे दर्शनासाठी भाविकांच्या रांगा लागल्या होत्या. काही नागरिकांनी सकाळी स्वातंत्र्यदिनाचा कार्यक्रम आटोपल्यानंतर कुटुंबीयांसह पर्यटनस्थळांकडे धाव घेतली. वाहतूक कोंडी नियंत्रणात ठेवण्यासाठी लोणावळा पोलिसांसह संबंधित यंत्रणांकडून प्रमुख चौक आणि गर्दीच्या ठिकाणी बंदोबस्त ठेवण्यात आला होता. मात्र, वाहनांची संख्या मोठ्या प्रमाणात वाढल्याने वाहतूक सुरळीत ठेवताना पोलिसांचीही दमछाक झाली.