वाल्हे : शेतकर्‍यांच्या मित्र असणार्‍या बैलांप्रती कृतज्ञता व्यक्त करण्यासाठी शेतकरी बैलपोळा सण मोठ्या उत्साहात साजरा करतात. (दि.१०) हा सण सर्वत्र उत्साहात व पारंपारिक पद्धतीने साजरा केला जाणार आहे. यावर्षी बैल पोळा एक दिवसांवर येऊन ठेपला असून वाल्हे (ता. पुरंदर) येथील बाजारपेठ फुलली, पण सजावटीच्या वस्तूंना मागणी नसल्याचे येथील व्यापारीवर्गाने सांगितले.

यंदा वाढती महागाई असली तरी यावर्षी मान्सूनपूर्व व मान्सून पाऊस पडला नसल्याने पाणीसाठा उपलब्ध नाही. खरीप हंगामातील पिकांची काढणी सुरू केली आहे. बैलपोळा उंबरठ्यावर आला तरी शेतकरी आणि मजूर वर्गाच्या हातात पैसा अन् कामही नाही. त्यामुळे पोळा यावर्षीही जेमतेमच साजरा होणार अशी स्थिती बाजारपेठमधील व्यवसायावरून जाणवत आहे.

भाववाढीमुळे वर्दळीची बाजारपेठ रोडावली आहे. शेतकऱ्यांचा जिव्हाळ्याचा, पारंपरिक अन् लोकसंस्कृतीचा वारसा असलेला हा सण, कोणत्याही परिस्थितीत साधेपणाने तरी साजरा करणारच अशा प्रतिक्रिया शेतकऱ्यांनी दिल्या. बाजारपेठेत विविध वस्तू खरेदीसाठी होणारी गर्दी दिसून येत नसल्याने व्यापारी निराशा होत आहे. पुरणपोळीचा गोड घासही महागला आहे.बैलांच्या सजावटीसाठी आवश्यक विविध वस्तूंच्या दरातही वाढ झाली नसली तरी दुष्काळसदृश परिस्थितीमुळे खपावरती परिणाम दिसून येत आहे. सजावटीच्या वस्तूंना मागणी नसल्यामुळे भांडवल निघेल की नाही, यांची चिंता व्यापाऱ्यांना आहे.

सजावटींच्या वस्तूंना मागणी नाही

ट्रॅक्टर शेतीमुळे बैलांचे प्रमाण आधीच कमी झाले आहे. त्यांच्या किंमतीही लाखाच्या पुढे गेल्या आहेत. सर्व वस्तू महाग झाल्या आहेत. समाधानकारक पाऊस आहे. तरीही बैलांच्या सजावटीसाठी लागणार्‍या वस्तूंना मागणी नाही, अशी माहिती व्यावसायिक संदीप पवार,अतुल शहा,अशोक राऊत,संजय शहा, पोपट गायकवाड, माऊली पवार यांनी सांगितले.