Manisha Bhanwala Gold : भारतीय कुस्तीत ऐतिहासिक सुवर्णक्षण; मनीषा भानवाला ठरली पहिली महिला वर्ल्ड चॅम्पियन, १६ वर्षांचा दुष्काळ संपवला
Manisha Bhanwala Gold : अस्ताना येथे झालेल्या जागतिक कुस्ती स्पर्धेच्या ५९ किलो वजनी गटाच्या अंतिम सामन्यात मनीषा भानवालाने अमेरिकेच्या अबीगेल नेटला ८-६ ने पराभूत करून भारतासाठी ऐतिहासिक सुवर्णपदक जिंकले.
Manisha Bhanwala Wins Historic Gold at World Wrestling Championships : भारतीय कुस्तीच्या इतिहासात ३० ऑक्टोबर २०२६ चा दिवस सुवर्ण अक्षरांनी कोरला गेला आहे. कझाकस्तानची राजधानी अस्ताना येथे पार पडलेल्या जागतिक कुस्ती अजिंक्यपद स्पर्धेत २९ वर्षीय भारतीय महिला कुस्तीपटू मनीषा भानवाला हिने ५९ किलो वजनी गटात सुवर्णपदक पटकावून नवा इतिहास रचला. सिनियर वर्ल्ड रेसलिंग चॅम्पियनशिपमध्ये सुवर्णपदक जिंकणारी ती भारताची पहिलीच महिला पैलवान ठरली आहे. यापूर्वी २०१० मध्ये सुशील कुमारने भारताला विश्व अजिंक्यपद स्पर्धेत सुवर्ण मिळवून दिले होते; त्यानंतर तब्बल १६ वर्षांनी भारताच्या खात्यात हे दुसरे सुवर्णपदक जमा झाले आहे.
०-६ ने पिछाडीवर असताना अद्भूत पुनरागमन; अमेरिकन चॅम्पियनला लोळवले
अंतिम सामन्यात मनीषासमोर अमेरिकेची पॅन अमेरिकन चॅम्पियन ॲबिगेल एलिझाबेथ नेट हिचे कडवे आव्हान होते. सामन्यात एका क्षणी मनीषा ०-६ अशा मोठ्या पिछाडीवर पडली होती. मात्र, तिने हिंमत न हारता तुफानी पुनरागमन केले आणि सलग गुण वसूल करत सामना ८-६ अशा फरकाने खिशात घातला. यापूर्वी उपांत्य फेरीत तिने यजमान कझाकस्तानच्या अल्तिन शगायेवाचा १०-० असा पराभव करत पिनफॉलने अंतिम फेरीत धडक मारली होती.
भारताची ऐतिहासिक कामगिरी; महिलांच्या खात्यात चार पदके
History made. Dreams realised. 🇮🇳
Raw moments from Manisha’s final match as she clinched Gold at the 2026 World Championships.
📸: @unitedworldwrestling https://t.co/vVfnD6o3Lr
— Wrestling Federation of India (WFI) (@wfi_wrestling) October 30, 2026
या स्पर्धेत भारतीय महिला कुस्तीपटूंनी आतापर्यंतची सर्वोत्तम कामगिरी नोंदवली. मनीषाच्या सुवर्णाआधी नीलम सिरोहीने ५० किलो आणि काजल ढोचकने ७६ किलो वजनी गटात रौप्यपदक पटकावले. तर ७२ किलो गटात तनु शर्माने अमेरिकेच्या खेळाडूला ९-५ ने नमवून कांस्यपदक मिळवले. या स्पर्धेत भारताने एकूण चार पदके जिंकली. २०२१ मध्ये अंशू मलिकने सर्वप्रथम अंतिम फेरी गाठली होती, मात्र तिला रौप्य मिळाले होते; मनीषाने सुवर्ण जिंकून भारताची प्रदीर्घ प्रतीक्षा अखेर संपवली.
वडिलांच्या निधनाचे दु:ख पचवून गाठले जागतिक शिखर –
मनीषाने २०१३ मध्ये तंदुरुस्तीसाठी कुस्तीला सुरुवात केली होती, ज्यासाठी तिचे वडील सुरेश यांनी तिला पाठिंबा दिला होता. २०२२ मध्ये जेव्हा ती आशियाई चॅम्पियनशिपसाठी मंगोलियाला रवाना होणार होती, तेव्हाच तिच्या वडिलांचे हृदयविकाराच्या झटक्याने अचानक निधन झाले. या प्रचंड वैयक्तिक आघातानंतरही मनीषाने माघार न घेता कुस्ती सुरू ठेवली आणि आज जगज्जेती बनून आपल्या वडिलांचे स्वप्न साकार केले.
