मुंबई : कृषिमंत्री माणिकराव कोकाटे यांचा विधान परिषदेत ऑनलाइन रमी खेळतानाचा व्हिडिओ व्हायरल झाल्याने राजकीय वर्तुळात खळबळ उडाली आहे. राष्ट्रवादी काँग्रेस (शरदचंद्र पवार) पक्षाचे आमदार रोहित पवार यांनी या प्रकरणात आणखी एक खुलासा करत कोकाटे यांच्यावर गंभीर आरोप केले आहेत.

विधिमंडळाच्या चौकशी अहवालानुसार, कोकाटे केवळ 42 सेकंद नव्हे, तर तब्बल 18 ते 22 मिनिटे सभागृहात पत्ते खेळत होते. हा अहवाल मुख्यमंत्री देवेंद्र फडणवीस आणि उपमुख्यमंत्री अजित पवार यांच्याकडे सादर करण्यात आला असून, त्यावर सरकार कारवाई करणार का, असा थेट सवाल रोहित पवार यांनी उपस्थित केला आहे. या प्रकरणाने महायुती सरकारच्या शिस्तीच्या दाव्यांवर पुन्हा एकदा प्रश्नचिन्ह उपस्थित केले आहे.

रोहित पवारांचा धक्कादायक दावा

रोहित पवार यांनी आपल्या ट्विटर (X) हँडलवरून कोकाटे प्रकरणावर नवीन माहिती शेअर केली आहे. त्यांनी लिहिले, “कृषिमंत्री सभागृहात केवळ 42 सेकंद पत्ते खेळत नव्हते, तर तब्बल 18 ते 22 मिनिटे पत्ते खेळत असल्याचा विधानमंडळाच्या चौकशीचा अहवाल आहे. हा अहवाल मुख्यमंत्री आणि उपमुख्यमंत्र्यांकडे सादर केला आहे.

सरकार याबाबत खुलासा करेल का? सभागृहात 18 ते 22 मिनिटे पत्ते खेळणाऱ्या कृषिमंत्र्यावर कारवाई न झाल्यास, मुख्यमंत्र्यांना अटलजींच्या आणि अजितदादांना यशवंतराव चव्हाण यांच्या विचारांचा वारसा सांगण्याचा नैतिक अधिकार राहील का?” असं ट्विट रोहित पवार यांनी केलं आहे. त्यामुळे आता माणिकराव कोकाटे यांच्यावर काय कारवाई होणार याकडे सर्वांचे लक्ष लागले आहे.