Manav Suthar Destiny : मुल्लानपूर कसोटी गाजवणाऱ्या मानव सुथारचं नशीब चमकलं! कसोटी रँकिंगमध्ये येताच इंग्लंडमधून आली मोठी ऑफर
Manav Suthar Destiny : अफगाणिस्तानविरुद्ध मुल्लानपूर कसोटीत आंतरराष्ट्रीय पदार्पण करणाऱ्या या युवा फिरकीपटूची नशीब अवघ्या काही दिवसांतच बदलले आहे.
Manav Suthar Enters ICC Test Rankings Joins County Cricket : काही दिवसांपूर्वीपर्यंत क्रिकेट जगतात ज्याला फारसे कोणी ओळखत नव्हते, त्या २३ वर्षांच्या मानव अवघ्या एकाच सामन्यात अशी काही जादू केली की, आज प्रत्येक क्रिकेटप्रेमीच्या जिभेवर त्याचेच नाव आहे. अफगाणिस्तानविरुद्ध मुल्लानपूर कसोटीत आंतरराष्ट्रीय पदार्पण करणाऱ्या या युवा फिरकीपटूची नशीब अवघ्या काही दिवसांतच बदलले आहे. त्याने केवळ ऐतिहासिक कामगिरीच केली नाही, तर थेट आयसीसीच्या ताज्या कसोटी क्रमवारीतही धमाकेदार एन्ट्री केली आहे.
पहिल्याच सामन्यात ७ विकेट्स अन् ‘सामनावीर’ किताब –
भारत आणि अफगाणिस्तान यांच्यातील एकमेव कसोटी सामन्यात कर्णधार शुबमन गिलने जेव्हा मानव सुथारला पदार्पणाची संधी दिली, तेव्हा त्याने या संधीचे सोने केले. सामन्याच्या पहिल्या डावात फलंदाजी करताना त्याने ४१ चेंडूंत २ चौकार आणि २ खणखणीत षटकारांच्या मदतीने २८ धावा कुटल्या. त्यानंतर गोलंदाजीत कहर करताना पहिल्या डावात २२ षटकांत १० मेडन टाकत अवघ्या ३३ धावांत ६ विकेट्स घेतल्या. दुसऱ्या डावातही त्याने १ विकेट घेतली. भारताच्या ‘एक डाव आणि ३०० धावांनी’ मिळालेल्या ऐतिहासिक विजयात मोलाचा वाटा उचलल्यामुळे त्याला सामनावीर घोषित करण्यात आले.
आयसीसी रँकिंगमध्ये मोठी झेप; आता इंग्लंडमधून आलं बोलावणं –
Warwickshire County Cricket Club announces the signing of Manav Suthar on a short-term contract.
He will be available for selection for the next two rounds of the Rothesay County Championship. Suthar, a left-arm finger-spinning all-rounder, made his Test Match debut for India… pic.twitter.com/yd5oe8GZte
— ANI (@ANI) June 10, 2026
बुधवारी (१० जून) आयसीसीने जाहीर केलेल्या ताज्या कसोटी रँकिंगमध्ये मानव सुथारने थेट ७२ व्या क्रमांकावरून आपले खाते उघडले आहे. सध्या त्याची रेटिंग २७२ इतकी आहे. पदार्पणाच्या सामन्यातच ५ हून अधिक विकेट्स घेत रँकिंगमध्ये स्थान मिळवणारा तो भारताचा विशेष फिरकीपटू ठरला आहे.
भारतीय संघ आता आगामी काळात केवळ वनडे आणि टी-२० सामने खेळणार असून कसोटी सामने नसल्याने मानव सुथारला या पांढऱ्या चेंडूच्या मालिकांमध्ये विश्रांती देण्यात आली आहे. मात्र, या रिकाम्या वेळेत सुथारचे नशीब आणखी चमकले आहे. त्याला इंग्लंडच्या प्रतिष्ठित ‘रोथेसे काउंटी चॅम्पियनशिप’कडून खेळण्याचे थेट आमंत्रण आले आहे. या स्पर्धेच्या दुसऱ्या फेरीत खेळण्यासाठी मानवने आपली संमती दिली आहे. इंग्लंडच्या खेळपट्ट्यांवर काउंटी क्रिकेट खेळून मानवला आपली फिरकी आणखी धारदार करण्याची सुवर्णसंधी मिळणार आहे.
