Richa Ghosh Form : विंडीजविरुद्ध भारताचा विजय, पण ‘या’ स्टार खेळाडूने विश्वचषकापूर्वी वाढवले कॅप्टन हरमनप्रीतचे टेन्शन!
Richa Ghosh Form : टी-२० विश्वचषक २०२६ स्पर्धेपूर्वी भारतीय संघाने सराव सामन्यात वेस्ट इंडिजचा २६ धावांनी पराभव करत विजयी सलामी दिली आहे.
Richa Ghosh Form T20 World Cup 2026 Warm Up Match : इंग्लंडमध्ये १२ जूनपासून सुरू होणाऱ्या महिला टी-२० विश्वचषक २०२६ स्पर्धेपूर्वी भारतीय संघाने सराव सामन्यात वेस्ट इंडिजचा २६ धावांनी पराभव करत विजयी सलामी दिली आहे. मात्र, या विजयानंतरही भारतीय संघाची डोकेदुखी कमी झालेली नाही. संघाची स्टार यष्टीरक्षक-फलंदाज ऋचा घोष हिचा खराब फॉर्म संघासाठी चिंतेचा विषय बनला आहे. विश्वचषक तोंडावर आलेला असतानाही तिची बॅट शांत असल्याने भारतीय गोटात चिंतेचे वातावरण आहे.
स्मृती-शेफाली फॉर्मात, पण ऋचा पुन्हा ‘शून्य’वर बाद!
या सराव सामन्यात भारताने प्रथम फलंदाजी करताना ८ बाद १७९ धावांचा मजबूत स्कोअर उभारला. भारतासाठी सकारात्मक गोष्ट म्हणजे स्मृती मानधना आणि शफाली वर्मा या सलामीवीरांनी ५.२ षटकांत ५९ धावांची तुफानी भागीदारी करत फॉर्ममध्ये परतण्याचे संकेत दिले. मध्यक्रमात यास्तिका भाटिया आणि भारती फूलमाली यांनीही उपयुक्त योगदान दिले.
A winning start to our #T20WorldCup preparations 👏#TeamIndia with a strong all-round outing to register a 2⃣6⃣-run victory against West Indies in the warm-up match 👌#WomenInBlue pic.twitter.com/uiPfFjTdHK
— BCCI Women (@BCCIWomen) June 8, 2026
मात्र, १६ व्या षटकात मैदानावर उतरलेली ऋचा घोष पहिल्याच चेंडूवर खाते न उघडता (शून्य धावांवर) बाद झाली. ऋचा फ्लॉप होण्याची ही सलग चौथी वेळ आहे. यापूर्वी इंग्लंडविरुद्धच्या टी-२० मालिकेत तिने अवघ्या ४, ८ आणि ६* अशा धावा केल्या होत्या. मोठ्या शॉट्ससाठी प्रसिद्ध असलेल्या ऋचाचा हा फॉर्म भारताचे विश्वविजेतेपदाचे स्वप्न अडचणीत आणू शकतो.
श्रेयांका पाटील आणि राधा यादवचा फिरकी चमत्कार!
१८० धावांच्या लक्ष्याचा पाठलाग करताना वेस्ट इंडिजच्या फलंदाजांना भारतीय फिरकीपटूंनी जखडून ठेवले. ऑफ-स्पिनर श्रेयांका पाटीलने ३६ धावांत ४ विकेट्स घेत विंडीजचे कंबरडे मोडले, तर डाव्या हाताची स्पिनर राधा यादवने २५ धावांत ३ बळी टिपले. या अचूक गोलंदाजीमुळे वेस्ट इंडिजचा संघ १५३ धावांवर रोखला गेला आणि भारताने २६ धावांनी सामना जिंकला. भारताचा पुढील आणि शेवटचा सराव सामना १० जून रोजी यजमान इंग्लंडविरुद्ध होणार आहे, तर १४ जून रोजी टीम इंडिया पाकिस्तानविरुद्ध विश्वचषकातील पहिला सामना खेळेल.
