Man Swept Away in Flood – खेड तालुक्यात शनिवारी रात्रीपासून सुरू असलेल्या मुसळधार पावसामुळे अनेक ओढे-नाले दुथडी भरून वाहत असून जनजीवन विस्कळीत झाले आहे. अशातच रेटवडी (ता. खेड) येथील बंगलावस्ती परिसरातील ओढ्याला आलेल्या पुरात दुचाकीसह एक तरुण वाहून गेल्याची दुर्दैवी घटना सोमवारी ( सकाळी पाऊणेअकरा वाजेच्या सुमारास घडली. समीर भिमाजी जाधव (वय ३०, रा. खालची ठाकरवाडी, रेटवडी) असे वाहून गेलेल्या तरुणाचे नाव आहे.

मिळालेल्या माहितीनुसार, समीर जाधव रविवारी सकाळी दुचाकीवरून रेटवडी गावातील एका दुकानात किराणा साहित्य आणि श्रीखंड खरेदीसाठी आला होता. साहित्य घेऊन पुन्हा घरी परतत असताना, सतारकावस्तीकडे जाणाऱ्या मार्गावरील बंगलावस्ती येथील ओढ्याला मोठा पूर आला होता. पाण्याचा प्रवाह वेगवान असतानाही त्याने ओढा ओलांडण्याचा प्रयत्न केला. मात्र, पुराच्या पाण्याचा वेग आणि खोलीचा अंदाज न आल्याने त्याची दुचाकी घसरली आणि तो दुचाकीसह पाण्यात वाहून गेला.

या घटनेची माहिती मिळताच परिसरातील नागरिकांनी तातडीने घटनास्थळी धाव घेऊन शोध सुरू केला. दरम्यान, समीरची दुचाकी ओढ्यालगत रस्त्यावरील एका मोठ्या दगडाला अडकलेल्या अवस्थेत आढळून आली. मात्र, समीरचा अद्याप शोध लागलेला नाही. घटनेची माहिती मिळताच खेड पोलीस आणि महसूल प्रशासनाचे अधिकारी घटनास्थळी दाखल झाले. स्थानिक ग्रामस्थांच्या मदतीने ओढ्यामध्ये आणि प्रवाहाच्या दिशेने युद्धपातळीवर शोधमोहीम सुरू करण्यात आली आहे.

सतत सुरू असलेल्या पावसामुळे पाण्याचा प्रवाह कायम असून शोधकार्यात मोठे अडथळे निर्माण होत आहेत. या दुर्दैवी घटनेमुळे रेटवडी आणि परिसरात तीव्र हळहळ व्यक्त होत असून शोककळा पसरली आहे. तालुक्यात सतत सुरू असलेल्या पावसामुळे ओढे-नाल्यांना अचानक पूर येत असल्याने, नागरिकांनी कोणत्याही परिस्थितीत पुराच्या पाण्यातून प्रवास करण्याचे टाळावे आणि प्रशासनाच्या सूचनांचे काटेकोर पालन करावे, असे आवाहन प्रशासनाकडून करण्यात आले आहे.