Eknath Shinde : राष्ट्रवादी काँग्रेसच्या शरद पवार गटाला भुसावळमध्ये मोठा राजकीय धक्का बसला आहे. दोन माजी नगराध्यक्षांसह ११ नगरसेवकांनी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला.

मुंबईत झालेल्या या पक्षप्रवेश सोहळ्यामुळे भुसावळच्या राजकीय वर्तुळात खळबळ उडाली असून, स्थानिक राजकीय समीकरणे बदलण्याची शक्यता व्यक्त केली जात आहे.

राष्ट्रवादी काँग्रेसचे माजी नगराध्यक्ष अनिल चौधरी आणि माजी नगराध्यक्षा गायत्री भंगाळे यांनी शिंदेसेनेत प्रवेश केला. दोन्ही नेत्यांचा भुसावळच्या राजकारणात मोठा प्रभाव असल्याने या पक्षप्रवेशाकडे विशेष महत्त्वाने पाहिले जात आहे.

नगराध्यक्षपदाच्या पार्श्वभूमीवर प्रवेशाची चर्चा

स्थानिक राजकीय वर्तुळात गायत्री भंगाळे यांच्या पक्षप्रवेशामागे भुसावळ नगरपालिकेतील नगराध्यक्षपदाचे समीकरण असल्याची चर्चा आहे. मात्र, या चर्चेला अधिकृत दुजोरा मिळालेला नाही.

२०२५ च्या भुसावळ नगरपालिका निवडणुकीत गायत्री भंगाळे नगराध्यक्षपदी विजयी झाल्या होत्या. मात्र, त्यांच्या जात प्रमाणपत्राला समितीने अवैध ठरवल्यानंतर त्या अपात्र ठरल्या होत्या.

📍 मुंबई |#जळगाव जिल्ह्यातील भुसावळ नगरपालिकेतील राष्ट्रवादी काँग्रेस शरद पवार गटाच्या ११ नगरसेवकांनी आज #शिवसेना पक्षात जाहीर प्रवेश केला. याप्रसंगी या सर्वांचे पक्षात स्वागत करून भावी यशस्वी वाटचालीसाठी शुभेच्छा दिल्या.

गायत्री भंगाळे, आणि अनिल चौधरी यांचा पक्षप्रवेश काल… pic.twitter.com/BNSwDKtxU1

— Eknath Shinde – एकनाथ शिंदे (@mieknathshinde) September 3, 2026

११ नगरसेवकांचा शिंदेसेनेत प्रवेश

गायत्री भंगाळे आणि अनिल चौधरी यांच्यासह भुसावळ नगरपालिकेतील शरद पवार गटाच्या ११ नगरसेवकांनी शिंदे गटात प्रवेश केला. यामध्ये गटनेते सचिन संतोष चौधरी, इक्बाल दिलनवाज शेख, उल्हास भीमराव पगारे, सुभद्रा गुंजाळ, अमीन कुरेशी, शेख नसीब शेख नदीम, सचिन भास्कर पाटील, अकील नादर पिंजारी, शबाना बी सिकंदर खान, पुष्पा कैलास चौधरी आणि सुनीता कृषधनकर यांचा समावेश आहे.

याशिवाय सिकंदर खान, नदीम सरकार, इसाक बागबान, ओमप्रकाश झा, गिरीश पारधी, महेंद्र चौधरी, नरसिंह तायडे, अनिकेत झा, नचिकेत मंदवाळे, आरिफ खान, आरिफ शेख यांच्यासह इतर सामाजिक कार्यकर्त्यांनीही शिंदेसेनेत प्रवेश केला.

एकनाथ शिंदेंनी केले स्वागत

पक्षप्रवेशानंतर उपमुख्यमंत्री एकनाथ शिंदे यांनी सर्वांचे पक्षात स्वागत केले. तसेच, त्यांच्या भावी राजकीय वाटचालीसाठी शुभेच्छा दिल्या. या मोठ्या पक्षप्रवेशामुळे भुसावळमध्ये शिंदेसेनेची ताकद वाढली असून, आगामी काळात स्थानिक राजकारणात याचे पडसाद उमटण्याची शक्यता आहे.

ISRO : इस्रोने इतिहास रचला! EOS-05 इमेजिंग उपग्रह प्रक्षेपित; शत्रूच्या हालचालींवर लक्ष ठेवणार