Siddhesh Kadam: पुणे दौऱ्यादरम्यान मनसे नेते अमित ठाकरे यांनी पंतप्रधान नरेंद्र मोदी यांचा फोटो हटवण्यास सांगितल्याने त्यांच्यासह २५ जणांवर गुन्हा दाखल करण्यात आला आहे.

याप्रकरणी तिघांना अटक करण्यात आली आहे. यानंतर भाजपने देखील यावर आक्रमक पवित्रा घेत मनसेविरोधात आंदोलन केले. मनसे-भाजप वादात आता शिंदेसेनेने देखील एन्ट्री केली आहे.  (Siddhesh Kadam)

मुंबईतील गोरेगाव पूर्वेकडील नेस्को संकुलात प्लास्टिक रिसायकलिंग कार्यक्रमाचे आयोजन करण्यात आले होते. यादरम्यान, महाराष्ट्र राज्य प्रदूषण नियंत्रण मंडळाचे अध्यक्ष तथा शिंदेंच्या शिवसेनेचे नेते रामदास कदम यांचे सुपुत्र सिद्धेश कदम यांनी अमित ठाकरे यांनी पंतप्रधानांच्या फोटोवरून घेतलेल्या भूमिकेविरोधात टीका केली आहे.

त्यांनी अमित ठाकरे यांचे हे वर्तन म्हणजे बालिशपणाचे असल्याचे म्हणत, जर मोदींचे नेतृत्व मान्य नसेल तर पाकिस्तानात जा! अशी जहरी टीका केली आहे.

नेमकं काय म्हणाले सिद्धेश कदम? (Siddhesh Kadam)

“अमित ठाकरे यांचे हे वर्तन म्हणजे बालिशपणा आहे. आजच्या युवा पिढीला काय पाहिजे, हे त्यांना कळत नाही. कुठेही आक्रमकता दाखवायची. नरेंद्र मोदी हे देशाचे पंतप्रधान आहेत, हे देखील ते विसरले. जगाच्या नकाशावर मोदी साहेबांचे वर्चस्व आहे. तुम्हाला ते मान्य नसेल तर तुम्ही पाकिस्तानमध्ये जा. तुम्ही भारतात कशाला राहता?,” असा सवाल सिद्धेश कदम यांनी केला.

दरम्यान, सिद्धेश कदम यांच्या या वक्तव्यामुळे भाजप-मनसे वादाला आता शिंदेसेनेच्या आक्रमक भूमिकेची फोडणी मिळाली आहे. त्यामुळे आता हा वाद आणखी वाढण्याची शक्यता आहे.

हेही वाचा: 

Suicide Prevention: मनातलं ओळखा, वेळेत मदतीचा हात द्या! आत्महत्येच्या विचारांवर बोलणं का आहे महत्त्वाचं?