अहमदाबादहून अकोल्यात आणण्यात आलेला हा 1900 किलो मिठाईचा साठा जप्त करण्यात आला. हा साठा अस्वच्छ आणि आरोग्यास घातक परिस्थितीत वाहतूक केल्याचे तपासणीत समोर आले आहे.

जप्त केलेल्या मिठाईची किंमत तब्बल 5 लाख 72 हजार रुपये आहे. गोपनीय माहितीच्या आधारे अन्न सुरक्षा अधिकाऱ्यांनी अकोल्यातील रायलीजिन परिसरात सकाळी साडेअकराच्या सुमारास तपासणी केली.

अहमदाबाद, गुजरातहून दोन ट्रकमधून अकोल्यात आणलेला विविध ब्रँडच्या मिठाईचा मोठा साठा यावेळी आढळून आला. यामध्ये अंबिका स्वीट हलवा, ग्वाल ट्रॅडिशनल स्वीट, श्री ग्वाल हलवा, अंबिका रिच स्वीट, ब्रजनिधी स्वीट आणि मुरलीधर स्वीट यांचा समावेश आहे.

या अन्न पदार्थांचे नियमित नमुने घेण्यात आले असून, उर्वरित 1900 किलो साठा जप्त करण्यात आला. जप्त केलेला साठा अकोला महापालिकेच्या भोड येथील बायोगॅस प्रकल्पात नष्ट करण्यात येणार आहे.

हा माल मागवणारे व्यापारी कमल शर्मा, वैभव पाटील आणि अशोक अहुजा यांचे परवाने निलंबित करण्यात आले आहेत. तर, दिवाळीच्या पार्श्वभूमीवर मिठाई आणि खाद्यपदार्थांच्या गुणवत्तेवर प्रशासनाची करडी नजर असल्याचे देखील या कारवाईतून स्पष्ट झाले आहे.