पुणे (प्रतिनिधी) – करोनाच्या परिस्थितीत केलेल्या नियमांचे उल्लंघन करणारे आडते, तसेच डमी आडत्यांवर मार्केट यार्डातील तरकारी विभागात मोठी कारवाई करण्यात आली . सोमवारी (दि.१०) तब्बल ५५ जणांवर कारवाई करून जीएसटीसह ५२ हजार १५३ रुपयांचा दंड वसुल करण्यात आला आहे.

एका दिवसात केलेली ही मोठी कारवाई आहे. कृषी उत्पन्न बाजार समितीचे प्रशासक मधुकांत गरड यांच्या मार्गदर्शनाखाली तरकारी विभागप्रमुख दत्तात्रय कळमकर यांनी ही कारवाई केली.

करोनाचा संसर्ग वाढला आहे. या पार्श्वभूमीवर संसर्ग रोखणे आणि गर्दी कमी करण्यासाठी बाजार समितीने मार्केटयार्डात नियमावली तयार केली आहे.  डमी व्यापाऱ्यांवर व्यापार करण्यास बंदी घालण्यात आली आहे. तर, बाजारातील निम्म्या पाकळ्या एक दिवस, दुसऱ्या दिवशी निम्म्या सुरु ठेवण्यात येत आहेत. याशिवाय इतर नियम बनविण्यात आले आहेत. या अनुषंगाने सोमवारी तरकारी विभागात गटप्रमुख डी.बी.वारघडे, डी. जी.थोपटे, एन.जे.राऊत यांनी कारवाई केली. पाकळी बंद असताना व्यापार करणाऱ्या व्यापारी आणि बंदी घातली असताना व्यापार करणाऱ्या डमी व्यापाऱ्यांवर ही कारवाई करण्यात आली.

दरम्यान फळ विभागात सोमवारी (दि. १०) करोनाच्या नियमाचे उल्लंघन करणाऱ्या पाच जणांवर कारवाई करून पाच हजार नऊशे रुपयांचा दंड वसूल करण्यात आला. विभागप्रमुख बाबासाहेब बिबवे यांच्या मार्गदर्शनाखाली गटप्रमुख बाळासाहेब कोंडे यांनी ही कारवाई केली.