Tukaram Mundhe Shegaon kachori : अन्न आणि औषध प्रशासन (FDA) आयुक्त तुकाराम मुंढे यांच्या आदेशानंतर राज्यभर भेसळयुक्त आणि निकृष्ट दर्जाच्या खाद्यपदार्थांविरोधात विशेष मोहीम राबविण्यात येत आहे.

या मोहिमेअंतर्गत शिर्डीनंतर आता शेगावमधील प्रसिद्ध कचोरी विक्रेत्यांवर अन्न व औषध प्रशासनाची नजर वळली असून, बुलढाणा जिल्हा अन्न व औषध प्रशासनाच्या पथकाने शेगावमधील प्रसिद्ध कचोरी सेंटरवर अचानक छापा टाकला आहे.

शेगाव हे संत गजानन महाराजांच्या दर्शनासाठी देशभरातील भाविकांचे प्रमुख श्रद्धास्थान मानले जाते. दररोज हजारो भाविक येथे येत असतात. दर्शनासोबतच शेगावची कचोरीही राज्यभर प्रसिद्ध आहे. त्यामुळे या खाद्यपदार्थाच्या गुणवत्तेबाबत आणि सुरक्षिततेबाबत खात्री करण्यासाठी प्रशासनाने ही कारवाई केली.

प्रसिद्ध कचोरी सेंटरवर अचानक धाड :  (Tukaram Mundhe Shegaon kachori )

अन्न व औषध प्रशासनाच्या पथकाने शेगावमधील तीरथराम करमचंद शर्मा या प्रसिद्ध कचोरी प्रतिष्ठानावर छापा टाकला. निरीक्षक गुलाबसिंग वसावे यांच्या नेतृत्वाखाली ही कारवाई करण्यात आली.

छापेमारीदरम्यान कचोरी तयार करण्यासाठी वापरला जाणारा कच्चा माल, खाद्यतेल, मसाले, बेसन, मैदा तसेच इतर घटकांची तपासणी करण्यात आली. यावेळी विविध नमुने अधिकृतरीत्या संकलित करून प्रयोगशाळेत तपासणीसाठी पाठविण्यात आले आहेत.

अधिकाऱ्यांनी स्पष्ट केले की, सध्या नमुने तपासणीसाठी पाठविण्यात आले असून प्रयोगशाळेचा अहवाल आल्यानंतरच पुढील निर्णय घेतला जाईल. नमुन्यांमध्ये भेसळ, निकृष्ट दर्जा किंवा अन्न सुरक्षा नियमांचे उल्लंघन आढळल्यास संबंधित प्रतिष्ठानाविरुद्ध अन्न सुरक्षा आणि मानके कायद्यानुसार (FSSAI) कारवाई केली जाऊ शकते.

शिर्डीतील पेढा प्रसादानंतर वाढली सतर्कता :

काही दिवसांपूर्वी शिर्डी परिसरातील प्रसाद विक्रेत्यांवरही एफडीएने धडक कारवाई केली होती. साईबाबा मंदिर परिसरातील काही खासगी दुकानांमध्ये विकल्या जाणाऱ्या पेढा प्रसादाच्या गुणवत्तेबाबत तक्रारी प्राप्त झाल्यानंतर अधिकाऱ्यांनी अचानक तपासणी मोहीम राबवली होती.

त्यावेळी विविध दुकानांमधून पेढ्यांचे नमुने संकलित करून प्रयोगशाळेत पाठविण्यात आले होते. या घटनांनंतर राज्यातील प्रमुख धार्मिक स्थळांवरील खाद्यपदार्थांच्या गुणवत्तेबाबत प्रशासन अधिक सतर्क झाले आहे.

राज्यभर विशेष तपासणी मोहीम :

आयुक्त तुकाराम मुंढे यांच्या निर्देशानुसार भेसळयुक्त अन्नपदार्थ, निकृष्ट दर्जाचे खाद्यपदार्थ, बेकायदेशीर औषध साठा आणि अन्न सुरक्षा नियमांचे उल्लंघन करणाऱ्या आस्थापनांवर राज्यभर व्यापक तपासणी मोहीम राबवली जात आहे. आगामी काळातही अशा कारवाया अधिक तीव्र करण्यात येणार असल्याचे संकेत प्रशासनाकडून देण्यात आले आहेत.