Mahendra Thorve : कर्जतचे शिंदेसेनेचे आमदार महेंद्र थोरवे (Mahendra Thorve) यांनी राष्ट्रवादी काँग्रेसचे प्रदेशाध्यक्ष आणि खासदार सुनील तटकरे यांच्यावर जोरदार हल्लाबोल केला आहे. दिवंगत अजित पवार असताना राष्ट्रवादी काँग्रेस विलीनीकरणाच्या 13 बैठका झाल्या, मग या बैठकांमध्ये अजित पवारांचे विश्वासू सहकारी म्हणून सुनील तटकरे का नव्हते? असा सवाल थोरवेंनी उपस्थित केला आहे.

थोरवे (Mahendra Thorve) म्हणाले, तटकरे हा खोटा आणि कपटी माणूस आहे. अजित पवार यांच्या निधनानंतर तटकरे सर्व आमदारांना फोन करत होते, जेणेकरून सर्व आमदार आपल्या बाजूला येतील. कारण, त्यांना उपमुख्यमंत्रीपद आणि अर्थखाते हवे होते, परंतू सुनेत्रा पवारांच्या खेळीने तटकरेंचा डाव उलटला.

दोन्ही राष्ट्रवादीच्या विलिनीकरणाबाबत अजित पवार यांनी मला पूर्ण कल्पना दिली होती हे सुनील तटकरे खोटे बोलत आहेत. अजित पवार यांच्या अपघाती मृत्यूवर तटकरे चकार शब्द काढत नाहीत. विलिनीकरणाबाबत आपल्याला काहीच माहिती नाही असे सांगणारे तटकरेंनी आता यू टर्न घेतला आहे, असे थोरवे (Mahendra Thorve) म्हणाले.

तटकरे यांनी राष्ट्रवादी काँग्रेसच्या विलिनीकरणाबाबत महत्त्वाचे भाष्य केले आहे. अजितदादा हयात असते तर आज दोन्ही राष्ट्रवादी पक्ष एकत्र असते, असे मोठे विधान त्यांनी केले होते. सोबतच राष्ट्रवादीच्या विलिनीकरणावर चर्चा झाली होती, असेही ते म्हणाले.

त्यांच्या या विधानानंतर राजकीय वर्तुळात एकच खळबळ उडाली. दरम्यान, तटकरेंच्या एका विधानाने राजकारणात चर्चांना पेव फुटल्याने आता त्यांनीच समोर येत विलिनीकरणाबाबत स्पष्टपणे सांगून टाकले. विलिनीकरण होणार नाही, असे तटकरे यांनी म्हटले आहे.