Pune News : देशाला हादरून सोडणारी धक्कादायक घटना सोमवारी सायंकाळी साडेसात वाजण्याच्या सुमारास राजधानी दिल्लीत घडली. दिल्लीतील लाल किल्ला मेट्रो स्टेशनजवळ असलेल्या परिसरात झालेल्या स्फोटोने संपूर्ण देशाला हादरून सोडले आहे. या स्फोटामुळे देशभरात महत्वाच्या शहरांना आणि धार्मिक स्थळांना अलर्ट देण्यात आला आहे. महाराष्ट्राचे मुख्यमंत्री देवेंद्र फडणवीस सोमवारी रात्री वर्षा निवास्थानी बैठक घेत सर्वच जिल्ह्यांतील पोलिस यंत्रणांना अलर्ट राहण्याच्या सूचना दिल्या आहेत. अशातच आता पुण्यातील धार्मिक दृष्टीने महत्वाच्या असलेल्या श्रीमंत दगडूशेठ मंदिर परिसरातील सुरक्षा यंत्रणात वाढ करण्यात आली आहे. श्रीमंत दगडूशेठ गणपती मंदिर पुणेकरांचे श्रद्धास्थान असून, मंदिर परिसरात मोठा फौजफाटा लावण्यात आला आहे. . बीडीडीएस पथकातील ‘आझाद’ नावाच्या श्वानाने मंदिर परिसराची तपासणी केली. येथे हजारो भाविक दररोज गणशाचे दर्शन घेण्यासाठी येत असतात. दिल्लीतील स्फोटाच्या घटनेमुळे सुरक्षेच्या कारणास्तव श्रीमंत दगडूशेठ मंदिर परिसरातील सुरक्षा वाढवण्यात आली आहे. पुण्यातील सिव्हिल कोर्ट मेट्रो स्टेशनाचीही पाहणी सुरू आहे. बीडीडीएस आणि मेट्रो सुरक्षा दलाने बंदोबस्त वाढवला. हे स्टेशन महत्वाचे असून, या मार्गावरून रोज मोठ्या संख्येने प्रवासी प्रवास करत असतात. यामुळे घातपात टाळण्यासाठी विशेष खबरदारी घेतली जात आहे. प्राथमिक तपास अहवालानुसार, स्फोटात अमोनियम नायट्रेटसारख्या उच्चशक्तीच्या स्फोटकांचा वापर झाला. आता हे प्रकरण एनआयए, राष्ट्रीय सुरक्षा रक्षक दल आणि दिल्ली पोलिसांच्या विशेष पथकांकडे वर्ग करण्यात आले आहे. या स्फोटात आतापर्यंत ८ जण ठार तर २० जखमी झाले आहेत. हेही वाचा : गाडीतून उतरले अन् पुढे जाताच… जितेंद्र यांचा व्हिडिओ तुफान व्हायरल
