स्वर्गिय मामासाहेब मोहोळ क्रीडानगरी – प्रतिष्ठित महाराष्ट्र केसरी कुस्ती स्पर्धेचा थरार येत्या मंगळवारपासून अनुभवता येणार आहे. येत्या 10 ते 14 जानेवारी या कालावधीत या राज्यस्तरीय कुस्ती स्पर्धेचा आखाडा भरणार असून विजेत्याला महिंद्रा थार जीप व रोख पाच लाखांचे बक्षीस, तर उपविजेत्याला ट्रॅक्‍टर व रोख अडीच लाखांचे बक्षीस मिळणार आहे. पालकमंत्री चंद्रकांत पाटील, भारतीय जनता पार्टीचे प्रदेशाध्यक्ष चंद्रशेखर बावनकुळे, ऑलिम्पिक पदक विजेता कुस्तीगीर योगेश्वर दत्त यांच्या हस्ते मंगळवारी (दि. 10) सायंकाळी 6 वाजता स्पर्धेचे उद्घाटन होणार आहे, अशी माहिती महाराष्ट्र केसरीचे प्रमुख संयोजक माजी महापौर मुरलीधर मोहोळ यांनी दिली.

Suryakumar Yadav | पाकिस्तानच्या खेळाडूकडून सूर्यकुमारचे तोंडभरून कौतुक, म्हणाला…

65 व्या महाराष्ट्र केसरीच्या तयारीचा आढावा व भव्य मैदानाची पाहणी केल्यानंतर मुरलीधर मोहोळ यांनी पत्रकारांशी संवाद साधला. प्रसंगी पुणे जिल्हा कुस्तीगीर संघाचे अध्यक्ष पै. संदीप भोंडवे, पुणे राष्ट्रीय तालीम संघाचे अध्यक्ष पै. योगेश दोडके, चिंचवड कुस्तीगीर संघाचे अध्यक्ष पै. हनुमंत गावडे, पुणे शहर राष्ट्रीय तालीम संघाचे विश्वस्त पै. तात्यासाहेब भिंताडे, पुणे जिल्हा कुस्तीगीर संघाचे कार्याध्यक्ष विलास कथुरे व जिल्हा परिषदेचे सदस्य व पै. ज्ञानेश्‍वर कटक यांच्यासह संयोजन समितीचे व विविध संघटनांचे पदाधिकारी उपस्थित होते.

Suryakumar Yadav | विराट कोहलीने ठेवलेली स्टोरी पाहून सूर्यकुमारचा आनंद गगनात मावेना

कोथरूड येथील कुस्तीमहर्षी स्वर्गीय मामासाहेब मोहोळ क्रीडानगरी पैलवान, कुस्तीप्रेमींच्या मेळ्यासाठी सज्ज झाली आहे. भव्य 32 एकर जागेत ही क्रीडानगरी साकारली असून, त्यात 12 एकरमध्ये 80 हजार आसनक्षमतेचे मैदान, दोन माती व तीन गादीचे आखाडे आहेत. अतिमहत्वाच्या व्यक्ती, पैलवान, महिला, पत्रकार यांच्यासाठी स्वतंत्र प्रेक्षागॅलरी उभारण्यात आल्या आहेत. 20 एकर जागेत पार्किंगची व्यवस्था करण्यात आली आहे.

यासह आरोग्य, अग्निशमन, सुरक्षा व्यवस्थेचे चोख नियोजन केले आहे. एका कार्डियाक ऍम्ब्युलन्ससह एकूण चार ऍम्ब्युलन्स, डॉक्‍टरांची टीम, 1000 पोलिसांचा बंदोबस्त तैनात असणार आहे. सह्याद्री व जहांगीर हॉस्पिटल आणि क्रस्ना डायग्नोस्टिक आरोग्य व्यवस्था पाहणार आहे, असे मुरलीधर मोहोळ म्हणाले. राज्यातील 45 तालीम संघातील विविध 18 वजनी गटात सुमारे 900 पेक्षा अधिक पैलवान स्पर्धेत सहभागी होणार आहेत.

मामासाहेबांना अभिवादन 

स्वर्गीय मामासाहेब मोहोळ यांच्या संकल्पनेतून आणि दूरदर्शी विचारातून महाराष्ट्र केसरी कुस्ती स्पर्धा सुरु झाली. यंदाच्या 65 व्या महाराष्ट्र केसरीचे संयोजन करण्याची जबाबदारी आम्हा मोहोळ कुटुंबियांकडे आली, ही आनंदाची व गौरवाची बाब आहे. महाराष्ट्र केसरीची मुहूर्तमेढ रोवणाऱ्या मामासाहेब मोहोळ यांच्या स्मृतींना अभिवादन करण्याचा प्रयत्न आम्ही करणार आहोत. त्यांच्या कर्तृत्वाला शोभेल अशा स्वरूपाची ही स्पर्धा होणार आहे, असेही मुरलीधर मोहोळ यांनी सांगितले.

ते पत्रक दिशाभूल करणारे 

भारतीय कुस्ती संघाने महाराष्ट्र कुस्तीगीर परिषदेच्या अस्थायी समितीमार्फत ही स्पर्धा अधिकृतपणे घेण्याची जबाबदारी संस्कृती प्रतिष्ठानवर सोपवली आहे. राज्यातील 45 तालीम संघांचे कुस्तीगीर, पदाधिकारी आमच्यासोबत आहेत व असे असतानाही खोडसाळपणे पत्रक काढून विरोधकांकडून दिशाभूल करण्याचा प्रयत्न केला जात आहे. यंदाची महाराष्ट्र केसरी यशस्वी करण्यासाठी आम्ही सर्वतोपरी प्रयत्न करत असून, अशा खोडसाळ गोष्टींवर लक्ष देण्याची गरज नाही, असे मुरलीधर मोहोळ यांनी नमूद केले.