Maharashtra Cabinet Tanaji Sawant : राज्यात राजकीय वर्तुळात सध्या मंत्रिमंडळ फेरबदलाच्या चर्चांनी जोर धरला आहे. शिंदे गटाचे माजी मंत्री तानाजी सावंत यांचं नाव अचानक समोर आलं आहे. उपमुख्यमंत्री एकनाथ शिंदे यांनी पुण्यात सावंत यांच्या घरी जाऊन घेतलेल्या भेटीमुळे या चर्चांना आणखी उधाण आले आहे.

गेल्या नऊ महिन्यांपासून मंत्रिपद न मिळाल्याने नाराज असलेल्या सावंत यांना पुन्हा मंत्रिमंडळात स्थान मिळण्याची शक्यता आहे. या भेटीचे फोटो समोर आल्यानंतर सावंत समर्थकांमध्ये उत्साहाचे वातावरण आहे.

तानाजी सावंत यांच्या भेटीमागचे राजकीय संकेत

मिळालेल्या माहितीनुसार, एकनाथ शिंदे यांनी तानाजी सावंत यांच्या तब्येतीची विचारपूस करण्यासाठी ही भेट घेतली. मात्र, राजकीय विश्लेषक या भेटीकडे मंत्रिमंडळ विस्ताराचे संकेत म्हणून पाहत आहेत. जर सावंत यांना मंत्रिमंडळात स्थान दिले, तर विद्यमान मंत्र्यांपैकी कोणाला बाहेरचा रस्ता दाखवला जाईल, याचीही चर्चा सुरू झाली आहे. विशेषतः, कृषीमंत्री माणिकराव कोकाटे आणि शिंदे गटाचे मंत्री संजय शिरसाट यांच्या मंत्रिपदावर टांगती तलवार आहे.

माणिकराव कोकाटेंवर संकट

कृषीमंत्री माणिकराव कोकाटे यांच्या कामगिरीवरून शिंदे-फडणवीस सरकारमध्ये नाराजी आहे. कोकाटे यांचे वारंवारचे ‘सेल्फ गोल’ आणि शेतकऱ्यांशी संबंधित मुद्द्यांवरील अपयश यामुळे त्यांचे मंत्रिपद धोक्यात आले आहे. छावा संघटनेचे प्रदेशाध्यक्ष विजयकुमार घाडगे पाटील यांनी तर कोकाटे यांचा राजीनामा न घेतल्यास राज्यभर शेतकऱ्यांसह आंदोलन करण्याचा इशारा दिला आहे. आज सकाळी उपमुख्यमंत्री अजित पवार आणि कोकाटे यांची भेट होण्याची शक्यता आहे, त्यानंतर दुपारी साडेबाराला होणाऱ्या कॅबिनेट बैठकीत याबाबत महत्त्वाचा निर्णय होऊ शकतो.

धनंजय मुंडेंच्या नावाचीही चर्चा

कोकाटे यांना मंत्रिमंडळातून बाहेर काढल्यास त्यांच्या जागी धनंजय मुंडे यांना पुन्हा मंत्रिमंडळात आणले जाईल, अशी शक्यता होती. मात्र, सावंत यांच्या भेटीनंतर आता त्यांच्या नावाने जोर धरला आहे. आगामी स्थानिक स्वराज्य संस्थांच्या निवडणुकांच्या पार्श्वभूमीवर शेतकऱ्यांचा विरोध टाळण्यासाठी सत्ताधारी पक्ष सावध पावले टाकत आहे.

अजित पवारांचा निर्णय ठरणार निर्णायक

आज होणारी अजित पवार आणि माणिकराव कोकाटे यांची भेट आणि त्यानंतरची कॅबिनेट बैठक मंत्रिमंडळ फेरबदलाच्या दृष्टीने महत्त्वाची ठरणार आहे. शेतकऱ्यांच्या नाराजीचा विचार करता अजित पवार कोकाटेंबाबत कठोर निर्णय घेण्याची शक्यता आहे. त्याचवेळी, एकनाथ शिंदे यांच्या तानाजी सावंत यांच्यासोबतच्या भेटीमुळे मंत्रिमंडळात वाइल्ड कार्ड एन्ट्री होण्याची शक्यता वाढली आहे.