Teachers suspended : राज्यात दहावी आणि बारावीच्या बोर्ड परीक्षांदरम्यान मास कॉपीच्या प्रकारांवर मोठी कारवाई करण्यात आली असून आतापर्यंत 81 शिक्षक व कर्मचाऱ्यांना निलंबित करण्यात आले आहे. ही माहिती राज्य मंडळाने परिपत्रकाद्वारे दिली आहे. यंदा परीक्षा केंद्रांवर लावलेल्या सीसीटीव्ही यंत्रणेमुळे मास कॉपीचे प्रकार पुराव्यासह समोर आले. त्यानंतर संबंधितांवर कठोर कारवाई करण्यात येत आहे. बीड जिल्ह्यातील चौसाळा येथील कला-विज्ञान कनिष्ठ महाविद्यालयाच्या केंद्र क्रमांक 224 वर बारावीच्या परीक्षेदरम्यान कॉपी झाल्याचे उघड झाले. या प्रकरणात प्रशासनाने 17 कर्मचाऱ्यांविरुद्ध गुन्हा दाखल करून त्यांना निलंबित केले. हा प्रकार 10 फेब्रुवारी रोजी पहिल्याच पेपरच्या दिवशी घडल्याची माहिती आहे. तसेच कन्नड तालुक्यातील जैतापूर येथील राष्ट्रीय उच्च माध्यमिक विद्यालयाच्या केंद्र क्रमांक 0079 वरही सामूहिक कॉपीचा प्रकार उघडकीस आला. सीसीटीव्ही फुटेजमध्ये पर्यवेक्षक आणि केंद्र संचालक प्रत्यक्ष-अप्रत्यक्ष मदत करत असल्याचे दिसून आल्याने 24 जणांविरुद्ध गुन्हा नोंदवण्यात आला असून त्यापैकी 21 जणांना निलंबित करण्यात आले आहे. दरम्यान जालना जिल्ह्यातील मंठा तालुक्यातील दोन केंद्रांवर इंग्रजी विषयाच्या पेपरदरम्यान विद्यार्थ्यांकडून कॉपी करताना आढळले. या प्रकरणात पर्यवेक्षक म्हणून नियुक्त असलेल्या 5 शिक्षकांवर कारवाई करण्यात आली आहे. याशिवाय गडचिरोली जिल्ह्यातील एका परीक्षा केंद्रावर राज्यशास्त्र विषयाच्या पेपरमध्ये मायक्रोनोट्स आणि प्रिंटआउटच्या मदतीने सामूहिक कॉपी केल्याचे आढळले. या प्रकरणात तीन शिक्षक आणि एका शिपायावर गुन्हा दाखल करून सर्वांना निलंबित करण्यात आले आहे. या कारवाईमुळे शिक्षण क्षेत्रात मोठी खळबळ उडाली आहे.
