Mahalunge MIDC – महाळुंगे औद्योगिक परिसरात विषारी पाणी पिल्यामुळे तब्बल 45 मेंढ्यांचा मृत्यू झाल्याची धक्कादायक घटना घडली आहे. सुमारे 200 मेंढ्यांचा कळप घेऊन आलेल्या मेंढपाळाचे लाखो रुपयांचे नुकसान झाले असून उर्वरित मेंढ्यांवर पशुवैद्यकीय विभागामार्फत उपचार सुरू आहेत. त्यामुळे मृत मेंढ्यांची संख्या आणखी वाढण्याची भीती व्यक्त केली जात आहे. मिळालेल्या माहितीनुसार, 22 जून रोजी संबंधित मेंढपाळ आपला मेंढ्यांचा कळप घेऊन खालुंब्रे येथून महाळुंगे परिसरात आला होता. परिसरातील पाण्याच्या स्रोतांमधून पाणी पिल्यानंतर मेंढ्यांना अचानक त्रास जाणवू लागला.

काही वेळातच अनेक मेंढ्या जमिनीवर कोसळल्या आणि आतापर्यंत 45 मेंढ्यांचा मृत्यू झाला आहे. विशेष म्हणजे, गेल्या एका वर्षात महाळुंगे परिसरात मेंढ्यांच्या मृत्यूची ही तिसरी घटना असल्याचे समोर आले आहे. त्यामुळे औद्योगिक परिसरातील पाण्याच्या गुणवत्तेबाबत गंभीर प्रश्नचिन्ह निर्माण झाले आहे. स्थानिकांच्या मते, काही ठिकाणी औद्योगिक सांडपाणी व रसायनयुक्त पाणी उघड्या स्रोतांमध्ये मिसळत असल्याने जनावरांच्या जीवाला धोका निर्माण होत आहे. या घटनेत संबंधित मेंढपाळाचे अंदाजे 10 ते 15 लाख रुपयांचे नुकसान झाले असून शासनाकडे नुकसानभरपाईची मागणी करण्यात आली आहे.

पशुसंवर्धन विभागाने मृत मेंढ्यांचे नमुने तपासणीसाठी पाठविले असून मृत्यूचे नेमके कारण अहवालानंतर स्पष्ट होणार आहे. दरम्यान, स्थानिक नागरिकांनी प्रशासनाने या घटनेची गंभीर दखल घेऊन कायमस्वरूपी उपाययोजना करण्याची मागणी केली आहे. औद्योगिक परिसरात रसायनयुक्त पाण्यामुळे जनावरांचे वारंवार बळी जात असल्यास मेंढपाळांना अशा भागात प्रवेश करण्याबाबत सूचना देणे तसेच धोकादायक पाणीस्रोतांभोवती इशारा फलक लावणे आवश्यक असल्याचे मत व्यक्त होत आहे.