IIT Baba: प्रयागराज महाकुंभ 2025 मध्ये “IIT बाबा” म्हणून चर्चेत आलेले अभय सिंह पुन्हा एकदा चर्चेचा विषय ठरले आहेत. यावेळी कारण आहे त्यांच्या आयुष्यातील मोठा निर्णय. संन्यासाचा मार्ग सोडून त्यांनी गृहस्थ जीवन स्वीकारले आहे. अलीकडेच त्यांनी विवाह करून आयुष्याचा नवा अध्याय सुरू केला आहे.

अभय सिंह यांनी इंडियन इस्टिट्यूट ऑफ टेक्नाॅलाॅजी बाॅम्बे (Indian Institute of Technology Bombay) मधून एयरोस्पेस इंजिनिअरिंगचे शिक्षण पूर्ण केले होते. त्यानंतर त्यांनी कॅनडामध्ये नोकरीही केली. मात्र, जीवनातील गूढ प्रश्नांची उत्तरे शोधताना त्यांचा कल अध्यात्माकडे वळला आणि त्यांनी संन्यासाचा मार्ग स्वीकारला. सॉक्रेटिस आणि प्लेटो (Socrates & Plato) यांसारख्या तत्त्वज्ञांच्या विचारांचा त्यांच्या जीवनावर प्रभाव पडला.

महाकुंभमध्ये त्यांच्या शांत स्वभावामुळे, रुद्राक्ष धारण केलेल्या वेगळ्या रूपामुळे आणि प्रभावी इंग्रजी बोलण्यामुळे ते विशेष लक्षवेधी ठरले होते. त्यामुळेच “IIT बाबा” ही त्यांची ओळख सर्वत्र प्रसिद्ध झाली. IIT Baba

हेही वाचा – Opinion Polls 2026: आसामध्ये BJP आघाडीवर, बंगालमध्ये चुरशीची लढत; केरळ-तमिळनाडूत रंजक चित्र 

आता त्यांनी 15 फेब्रुवारी 2026 रोजी महाशिवरात्री (Mahashivratri) च्या शुभ मुहूर्तावर हिमाचल प्रदेशातील अघनजार महादेव मंदिर (Aghanjar Mahadev Temple) येथे प्रतीका यांच्याशी विवाह केला. प्रतीका या बेंगळुरू येथील इंजिनिअर असून, दोघे सध्या धर्मशाला येथे राहून नव्या आयुष्याची सुरुवात करत आहेत.

विवाहानंतर अभय सिंह पत्नीसमवेत हिसार येथे गेले. अनेक वर्षांनंतर कुटुंबाशी त्यांची भेट झाली. आई शीला देवी यांनी दोघांचेही प्रेमाने स्वागत केले. हा क्षण त्यांच्या कुटुंबासाठी अत्यंत भावनिक आणि संस्मरणीय ठरला.

दीर्घकाळ वैराग्याचे जीवन जगल्यानंतर अभय सिंह यांनी घेतलेला हा निर्णय अनेकांना आश्चर्यचकित करणारा आहे. काही जण याकडे जीवनातील नैसर्गिक बदल म्हणून पाहत आहेत. IIT Baba

पत्नी प्रतीका यांच्या मते, अभय सिंह अत्यंत साधे आणि प्रामाणिक व्यक्ती आहेत. दोघांची भेट सुमारे वर्षभरापूर्वी झाली होती. आता ते दोघे मिळून सनातन संस्कृतीचा प्रसार करण्याचा संकल्प करत आहेत. भविष्यात “सनातन युनिव्हर्सिटी”सारख्या प्रकल्पावर काम करण्याचीही त्यांची योजना आहे.