Akhilesh Yadav | Mahakumbh 2025 : समाजवादी पक्षाचे प्रमुख आणि उत्तर प्रदेशचे माजी मुख्यमंत्री अखिलेश यादव यांनी रविवारी, २६ जानेवारी रोजी प्रयागराज येथे पोहोचून त्रिवेणी संगमात स्नान केले. आतापर्यंत महाकुंभातील भाविकांची संख्या ११ कोटींहून अधिक झाली आहे. सध्या, महाकुंभाच्या १३ दिवसांमध्ये भाविकांची गर्दी वाढली आहे. मौनी अमावस्येनिमित्त संगमात १० कोटी भाविक स्नान करण्याची शक्यता आहे. यासाठी प्रशासनाने तयारी देखील केली आहे.

समाजवादी पक्षाचे प्रमुख अखिलेश यादव आज प्रयागराज महाकुंभात पोहोचले, जिथे त्यांनी संगमात पवित्र स्नान केले. याचा एक व्हिडिओ सोशल मीडियावर देखील च्यारलं झाला आहे. व्हिडिओमध्ये अखिलेश यादव पवित्र त्रिवेणी संगमात स्नान करताना दिसत आहेत. गंगा स्नान करताना सूर्याला जल अर्पण केले. यावेळी अखिलेश यादव यांनी महाकुंभमेळा परिसरात स्थापित समाजवादी पक्षाचे संस्थापक मुलायम सिंह यादव यांच्या पुतळ्याला पुष्पहार अर्पण केला. यावेळी सपा प्रमुख अखिलेश यादव यांच्यासह इतर नेते आणि कार्यकर्तेही उपस्थित होते.

संगमात स्नान केल्यानंतर, अखिलेश यादव यांनी माध्यमांशी संवाद साधला. ते म्हणाले की, “मी आज महाकुंभात स्नान करून जात आहे. मी ११ गोता मारल्या. आजच्या महाकुंभातून सकारात्मक संदेश गेला पाहिजे. आज आपण हा संकल्प करूया की जेव्हा जेव्हा आपण कुंभमेळ्याचे स्मरण करतो तेव्हा तेव्हा सद्भावना आणि सहिष्णुता नेहमीच टिकून राहावी. आधी मी हरिद्वारमध्ये स्नान केले होते आणि आज मला संगममध्ये स्नान करण्याची संधी मिळाली आहे.

ते पुढे म्हणाले की, आमचा संकल्प असा आहे की सद्भावना आणि सहिष्णुता कायम राहिली पाहिजे आणि सहिष्णुतेने स्नान केले पाहिजे. सरकारने महाकुंभाला क्रीडा स्पर्धा बनवू नये. मी माझ्या स्वतःच्या डोळ्यांनी पाहिले आहे की वृद्ध महिला आणि पुरुष दूरदूरच्या ठिकाणाहून चालत महाकुंभात येत आहेत, परंतु जर सरकार महाकुंभावर हजारो कोटी रुपये खर्च करत असेल, तर वृद्धांसाठी काही व्यवस्था करायला हवी होती. असं देखील ते म्हणाले.

यावेळी सपा प्रमुख अखिलेश यादव यांनी उत्तर प्रदेशचे मुख्यमंत्री योगी यांच्या बुलडोझर कारवाईवर म्हटले की, ‘बुलडोझर चालो वा न चालो, जेव्हा सरकार नसेल तेव्हा बुलडोझर कोणाकडे असेल. असं टोला त्यांनी लगावला.