Mahabaleshwar Rescue – महाबळेश्वर प्रतापगड घाटातील मेटतळे धबधब्याजवळ सुमारे 200 फूट खोल दरीत पडलेल्या एका व्यक्तीस प्रतापगड सर्च अँड रेस्क्यू टीम आणि महाबळेश्वर ट्रेकर्सच्या युवकांनी धाडसी कामगिरी करत सुखरुप बाहेर काढले. अधिक माहिती अशी, शनिवारी (दि. 20) मेटतळे वॉटरफॉलच्या परिसरात एक व्यक्ती लघुशंकेसाठी गेला असता तोल गेल्याने सुमारे 200 फूट खोल दरीत कोसळला. या घटनेची माहिती मिळताच प्रतापगड सर्च अँड रेस्क्यू टीमचे सदस्य तातडीने घटनास्थळी रवाना झाले.

त्यांनी घटनेची माहिती महाबळेश्वर पोलीस स्टेशनला दिली. त्यानंतर बचावकार्यासाठी आवश्यक रोप आणि इतर साहित्याचा सेटअप उभारण्यात आला. रोपच्या सहाय्याने टीमचे सदस्य दरीत उतरले आणि जखमी व्यक्तीचा शोध सुरू केला. काही वेळाच्या शोध मोहिमेनंतर संबंधित व्यक्ती दरीत जखमी अवस्थेत आढळून आला. दरम्यान, महाबळेश्वर ट्रेकर्सचे सदस्यही घटनास्थळी दाखल झाले. शनिवारी झालेल्या पावसामुळे येथील परिसर चिखलमय झाल्याने जखमी व्यक्तीला दरीतून बाहेर काढण्यासाठी मोठी कसरत करावी लागली.

अखेर प्रतिकूल परिस्थितीवर मात करत बचाव पथकाने स्ट्रेचर आणि रोपच्या सहाय्याने जखमी व्यक्तीला दरीतून सुखरूप बाहेर काढले. या बचाव मोहिमेत प्रतापगड सर्च अँड रेस्क्यू टीमचे अनिकेत वागदरे, अजित जाधव, ऋषिकेश जाधव, अवि उतेकर, गणेश वागदरे आणि विक्रांत जाधव यांनी सहभाग घेतला. तसेच महाबळेश्वर ट्रेकर्सचे सोमनाथ वागदरे, सुजित कोळी, दीपक ओंबळे, श्रीकांत नाविलकर तसेच महाबळेश्वर पोलीस स्टेशनच्या कर्मचार्‍यांनीही बचाव कार्यात मोलाचे सहकार्य केले. या धाडसी बचाव मोहिमेबद्दल सर्व स्तरांतून बचाव पथकाचे कौतुक होत आहे.