चौथ्या टप्प्यात तब्बल 28 टक्के उमेदवार कोट्यवधी ; सर्वात गरीब उमेदवाराची संपत्ती वाचून तुम्हाला बसेल धक्का
Lok Sabha Election । लोकसभा निवडणुकीच्या चौथ्या टप्प्यासाठी १३ मे रोजी मतदान होणार आहे. या टप्प्यात तेलंगणा आणि आंध्र प्रदेशसह 10 राज्यांमधील 96 जागांवर निवडणूक होणार आहे. एडीआरच्या अहवालानुसार, चौथ्या टप्प्यात एकूण 1,717 उमेदवार निवडणूक लढवत आहेत. चौथ्या टप्प्यात आंध्र प्रदेशातील गुंटूर मतदारसंघातून निवडणूक लढवणारे टीडीपीचे डॉ. चंद्रशेखर पेम्मासानी हे सर्वात श्रीमंत उमेदवार आहेत. पेम्मासानी यांनी त्यांची एकूण संपत्ती 5,705 कोटी रुपयांपेक्षा जास्त असल्याचे घोषित केले आहे.
कट्टा आनंद बाबू सर्वात गरीब उमेदवार Lok Sabha Election ।
दुसरीकडं सर्वात गरीब उमेदवार आंध्र प्रदेशातील अपक्ष उमेदवार कट्टा आनंद बाबू आहेत, ज्यांनी प्रतिज्ञापत्रात आपली एकूण संपत्ती फक्त 7 रुपये असल्याचे घोषित केले आहे. एडीआरच्या अहवालानुसार, कट्टा आनंद बाबू यांनी दावा केला आहे की, त्यांच्याकडे फक्त 7 रुपये आहेत. आनंद बाबू आंध्र प्रदेशातील बापटला (SC) मतदारसंघातून निवडणूक लढवत आहेत. त्याचप्रमाणे महाराष्ट्रातील मावळमधून निवडणूक लढवणारे संतोष उबाळे यांनी 83 रुपये, तर भोर विकास रोहिदास यांनी 90 रुपयांची संपत्ती जाहीर केली आहे.
28 टक्के उमेदवार कोट्यवधी Lok Sabha Election ।
असोसिएशन फॉर डेमोक्रॅटिक रिफॉर्म्स (ADR) आणि नॅशनल इलेक्शन वॉचने 1,717 उमेदवारांपैकी 1,710 उमेदवारांच्या निवडणूक प्रतिज्ञापत्रांचे विश्लेषण केले आहे. एडीआरच्या अहवालानुसार, लोकसभा निवडणुकीच्या चौथ्या टप्प्यात 476 उमेदवारांनी (28 टक्के) त्यांची संपत्ती 1 कोटी रुपयांहून अधिक असल्याचे जाहीर केले आहे. उमेदवारांची सरासरी मालमत्ता 11.72 कोटी रुपये आहे.
आंध्र प्रदेशातील गुंटूरमधून निवडणूक लढवणारे तेलुगू देसम पक्षाचे डॉ. चंद्रशेखर पेम्मासानी यांची संपत्ती 5,705 कोटी रुपयांपेक्षा जास्त आहे, तर भारतीय जनता पक्षाचे उमेदवार कोंडा विश्वेश्वर रेड्डी दुसऱ्या क्रमांकावर असून त्यांची मालमत्ता 4,568 कोटी रुपये आहे. रेड्डी तेलंगणातील चेवेल्ला येथून निवडणूक लढवत आहेत.
एडीआरने प्रसिद्ध केलेल्या अहवालानुसार, चौथ्या टप्प्यातील 70 भाजप उमेदवारांपैकी 65 किंवा 93 टक्के कोट्यधीश आहेत. तर काँग्रेसचे ५६ उमेदवार करोडपती आहेत. दुसरीकडे, शिवसेना (UBT), बिजू जनता दल (BJD), राष्ट्रीय जनता दल (RJD), TDP, भारत राष्ट्र समिती आणि शिवसेनेने उभे केलेले सर्व उमेदवार करोडपती आहेत.
पश्चिम बंगालमधील सत्ताधारी अखिल भारतीय तृणमूल काँग्रेसचे सात उमेदवार करोडपती आहेत आणि समाजवादी पक्षाच्या 19 उमेदवारांपैकी 11 (58 टक्के) उमेदवारांनी 1 कोटी रुपयांपेक्षा जास्त संपत्ती जाहीर केली आहे.
चौथ्या टप्प्यातील भाजप उमेदवारांची सरासरी मालमत्ता 101.77 कोटी रुपये आहे, तर काँग्रेसच्या उमेदवारांची सरासरी मालमत्ता 23.66 कोटी रुपये आहे. निवडणुकीच्या रिंगणात सर्वाधिक (९२) उमेदवार उभे करणाऱ्या बहुजन समाज पक्षाच्या उमेदवारांची सर्वात कमी सरासरी घोषित संपत्ती १.९४ कोटी रुपये आहे.
लोकसभा निवडणुकीच्या चौथ्या टप्प्यात भाजपने 70 उमेदवार उभे केले असून त्यापैकी 10 उमेदवारांची संपत्ती 50 कोटींहून अधिक आहे. पक्षाच्या सुमारे 44.3 टक्के उमेदवारांनी 1 कोटी ते 10 कोटी रुपयांच्या दरम्यान संपत्ती जाहीर केली आहे. केवळ 5 उमेदवारांची संपत्ती 1 कोटी रुपयांपेक्षा कमी आहे.
काँग्रेसच्या 61 उमेदवारांपैकी 7 उमेदवारांची संपत्ती 50 कोटींहून अधिक आहे. सुमारे आठ टक्के लोकांकडे एक कोटी रुपयांपेक्षा कमी संपत्ती आहे. दुसरीकडे, 19 सपा उमेदवारांपैकी 8 उमेदवारांकडे 1 कोटी ते 10 कोटी रुपयांची संपत्ती आहे. युवाजन श्रमिका रयथू काँग्रेस पक्षाच्या 25 उमेदवारांपैकी फक्त एका उमेदवाराची संपत्ती 1 कोटी रुपयांपेक्षा कमी आहे, तर सहा उमेदवार आहेत ज्यांची संपत्ती 50 कोटी रुपयांपेक्षा जास्त आहे. लोकसभेच्या चौथ्या टप्प्यातील मतदान १३ मे रोजी होणार आहे. 10 राज्ये आणि केंद्रशासित प्रदेशातील 1,710 उमेदवारांचे भवितव्य ईव्हीएममध्ये सील होणार आहे.
