MLC Election : राज्यातील विधानपरिषदेच्या १७ जागांसाठी निवडणूक कार्यक्रम जाहीर झाल्यानंतर महायुती आणि महाविकास आघाडीत हालचालींना वेग आला आहे. महायुतीत जागावाटपासाठी १२-४-१ असा प्राथमिक फॉर्म्युला चर्चेत असून त्यानुसार भाजप १२, शिंदे गटाची शिवसेना ४ आणि राष्ट्रवादी काँग्रेसला १ जागा मिळण्याची शक्यता व्यक्त होत आहे. मात्र, यासंदर्भातील अंतिम निर्णय अद्याप झालेला नसून लवकरच तिन्ही पक्षांच्या प्रमुखांची बैठक होणार आहे.

४८ इच्छुकांची यादी तयार –  (MLC Election)

दरम्यान, भाजपने आपल्या १२ जागांसाठी उमेदवारांची चाचपणी सुरू केली असून तब्बल ४८ इच्छुकांची यादी तयार करण्यात आल्याची माहिती समोर आली आहे. भाजप प्रदेशाध्यक्ष रवींद्र चव्हाण हे ही यादी घेऊन मंगळवारी दिल्लीला रवाना झाले आहेत. दिल्ली दौऱ्यात ते भाजपचे राष्ट्रीय अध्यक्ष नितीन नवीन तसेच केंद्रीय गृहमंत्री अमित शाह यांची भेट घेणार असून संभाव्य उमेदवारांच्या नावांवर चर्चा होणार आहे.

पुढील दोन ते तीन दिवसांत अंतिम यादी –  (MLC Election)

भाजपमध्ये उमेदवार निश्चितीसाठी हालचालींना वेग आला असून पुढील दोन ते तीन दिवसांत अंतिम यादी जाहीर होण्याची शक्यता आहे. उमेदवारी अर्ज दाखल करण्याची अंतिम मुदत १ जून असल्याने पक्षश्रेष्ठींकडून लवकर निर्णय घेतला जाणार असल्याचे सांगितले जात आहे. दिल्ली दौऱ्यात महायुतीतील जागावाटप, संभाव्य उमेदवार आणि निवडणुकीतील रणनीती याबाबत केंद्रीय नेतृत्वाला सविस्तर माहिती दिली जाणार आहे.

हेही वाचा –  भाजप आमदाराच्या भावाने पहिल्याच दिवशी नेला अर्ज; इच्छुकांमध्ये खळबळ 

विधानपरिषदेच्या जागांवरून शिंदे नाराज?

विधानपरिषद निवडणुकीच्या पार्श्वभूमीवर मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात अनेक बैठका झाल्या आहेत. मात्र, जागावाटपावर अद्याप अंतिम तोडगा निघालेला नसल्याचे चित्र आहे.

मंगळवारी झालेल्या बैठकीनंतर पत्रकारांनी विधानपरिषदेच्या जागांबाबत प्रश्न विचारताच एकनाथ शिंदे नाराज झाल्याचे पाहायला मिळाले. त्यांच्या बदललेल्या देहबोलीमुळे महायुतीतील जागावाटपावरून मतभेद वाढल्याच्या चर्चांना उधाण आले आहे.

विधान परिषद निवडणूक २०२६ : कार्यक्रम

अधिसूचना जारी : २५ मे
उमेदवारी अर्ज भरण्याची अंतिम तारीख : १ जून
अर्जांची छाननी : २ जून
अर्ज माघारीची अंतिम तारीख : ४ जून
मतदान : १८ जून (सकाळी ८ ते दुपारी ४)
मतमोजणी : २२ जून