Amruta Fadnavis : मुख्यमंत्रीपद असो, दिल्लीतील मोठी जबाबदारी असो किंवा राज्याच्या राजकारणातील पुढची भूमिका… देवेंद्र फडणवीस यांच्या राजकीय भवितव्याबाबत चर्चा सुरू झाली की महाराष्ट्राच्या राजकीय वर्तुळात तर्क-वितर्कांना उधाण येतं. फडणवीस हे राज्याच्या राजकारणातील भाजपचे प्रमुख चेहरे असून, त्यांच्या दिल्लीतील संभाव्य भूमिकेबाबत अधूनमधून चर्चांना सुरुवात होते.

आता या चर्चेला त्यांच्या पत्नी अमृता फडणवीस यांच्या एका वक्तव्यामुळे नवा रंग मिळाला आहे. देवेंद्र फडणवीस यांनी महाराष्ट्रातच राहून राज्याची सेवा करावी, अशी आपली इच्छा असल्याचं अमृता फडणवीस यांनी स्पष्ट केलं आहे.

“फडणवीसांना महाराष्ट्राचीच सेवा करू द्या, त्यांना दिल्लीत का पाठवताय?” असा थेट सवालच अमृता फडणवीस यांनी केला आहे. देवेंद्र फडणवीस हे केवळ नागपूरचे नसून संपूर्ण महाराष्ट्राचे सेवक आहेत आणि महाराष्ट्राची सेवा करण्यापेक्षा मोठी जबाबदारी त्यांच्यासाठी दुसरी कोणती असू शकत नाही, असंही त्यांनी म्हटलं आहे. त्यामुळे फडणवीसांच्या दिल्लीवारीच्या चर्चांमध्ये अमृता फडणवीसांच्या या वक्तव्याची चांगलीच चर्चा रंगली आहे.

महाराष्ट्राचे हित आणि राज्यातील कामकाज हेच महत्त्वाचे असून, यापेक्षा मोठी कोणतीही जबाबदारी असू शकत नाही, असे त्यांचे मत आहे. देवेंद्र फडणवीस जेव्हा दिल्लीला जातात, तेव्हा त्यांना नवी जबाबदारी मिळण्याची शक्यता वर्तवली जाते.

या संदर्भात बोलताना अमृता फडणवीस यांनी, महाराष्ट्र हे देशासाठी सर्वाधिक योगदान देणारे राज्य आहे आणि इथे देवेंद्र फडणवीस यांच्यासारखा जबाबदार नेता कार्यरत असल्याचा त्यांना आनंद आहे असे सांगितले. त्यांनी देवेंद्र फडणवीस यांनी महाराष्ट्रातच कार्यरत राहावे अशी इच्छा व्यक्त केली.

दरम्यान, फडणवीसांच्या दिल्लीतील संभाव्य भूमिकेबाबत याआधीही राजकीय वर्तुळात चर्चा होत राहिल्या आहेत. मात्र, कोणत्याही चर्चेचा अर्थ प्रत्यक्षात केंद्रीय पातळीवर नवी जबाबदारी मिळणारच असा होत नाही. त्यामुळे अमृता फडणवीसांचं वक्तव्य हे त्यांच्या वैयक्तिक मताच्या स्वरूपात पाहणं अधिक योग्य ठरेल.