Laxman Hake :ओबीसी नेते लक्ष्मण हाके यांनी मराठा आरक्षण कार्यकर्ते मनोज जरांगे यांच्यावर तीव्र टीका करताना त्यांना आरक्षणाच्या मुद्द्यावरील समज कमी असल्याचा टोला लगावला. “आरक्षणाची प्रक्रिया आणि त्यातील बारकावे जरांगेंना किती कळतात? ज्या जाती ओबीसींमध्ये समाविष्ट केल्या जात आहेत, त्या उपजातीच आहेत,” असे हाके म्हणाले. त्यांनी आतापर्यंत वाटप झालेली कुणबी प्रमाणपत्रे बोगस आणि बेकायदेशीर असल्याचा गंभीर आरोप केला.

मुंबईत दंगली घडवण्याचा डाव?
हाके यांनी जरांगेंवर मुंबईतील कायदा व सुव्यवस्थेला धोका निर्माण करण्याचा प्रयत्न करत असल्याचा आरोप केला. “मुंबईत दंगली घडवण्याचा अधिकार तुम्हाला कोणी दिला? मंत्र्यांना अंतरवाली सराटी येथे बोलवा, मुंबईत अशांतता का निर्माण करत आहात?” असा सवाल त्यांनी उपस्थित केला. तसेच, “ज्या जाती मागासलेल्या आहेत, त्यांना पुढे आणण्यासाठी आरक्षण दिले जाते. मात्र, कुणबी नोंदी आढळल्या म्हणून तुम्ही मागास कसे ठरता?” असा थेट प्रश्न त्यांनी जरांगेंना विचारला.

ओबीसी संघर्ष यात्रेची घोषणा –
ओबीसींच्या हक्कांसाठी लढा तीव्र करण्याचे संकेत देत हाके म्हणाले, “राज्यातील प्रत्येक जिल्ह्यात आम्ही बैठका घेत आहोत. ओबीसींची संघर्ष यात्रा निश्चितपणे काढली जाईल. याबाबत लवकरच अंतिम निर्णय जाहीर होईल.” ते पुढे म्हणाले, “कोणीतरी मुंबईला जाऊन यंत्रणेला वेठीस धरत आहे, पण आम्ही तसे करणार नाही. आमचा लढा कायदेशीर मार्गाने असेल.”

बोगस कुणबी विरुद्ध कुणबी असा लढा –
हाके यांनी जरांगेंच्या आंदोलनावर टीका करताना म्हटले की, आता लढाई ओबीसी विरुद्ध कुणबी अशी नाही, तर बोगस कुणबी विरुद्ध खऱ्या कुणबी अशी आहे. “कुणबीचा आधार घेऊन कोणी घुसखोरी करत असेल, तर ते ओबीसींचे आरक्षण संपवण्याचा डाव आहे. जे काही घडत आहे, ते सर्वोच्च न्यायालयाच्या निर्णयाचे उल्लंघन आहे,” असे त्यांनी ठणकावले. तसेच, मुख्यमंत्र्यांना टार्गेट करण्याचा जरांगेंचा अजेंडा असल्याचा आरोपही त्यांनी केला. हाके यांनी स्पष्ट केले की, आरक्षणाचे अधिकार हे आयोगांना असतात आणि कोणत्याही जातीला आरक्षण देण्याची प्रक्रिया काटेकोरपणे पाळली जाते.