Latur News : लातूर जिल्ह्यात (Latur News) बुधवारी सकाळी एका खाजगी शाळेची बस उलटल्याने 22 विद्यार्थी जखमी झाले आहेत. त्यापैकी एकाची प्रकृती गंभीर आहे, अशी माहिती पोलिसांनी दिली. ही घटना सकाळी साडे नऊच्या सुमारास घडली.

पुण्यश्लोक अहिल्यादेवी होळकर विद्यालय, राचन्नावाडी येथील सुमारे ३५ विद्यार्थ्यांना घेऊन जाणारी बस शाळेकडे जात असताना चालकाचे वाहनावरील नियंत्रण सुटले. यामुळे बस रस्त्यावरून खाली उतरली आणि चाकूर तालुक्यातील सांडोल-महांडोल रस्त्यावरील एका लहान गटारात उलटली, असे निरीक्षक बालाजी भांडे यांनी प्राथमिक माहितीच्या आधारे सांगितले.

अपघाताची माहिती मिळताच स्थानिक नागरिक घटनास्थळी पोहोचले आणि त्यांनी जखमी विद्यार्थ्यांना तातडीने चाकूर येथील ग्रामीण रुग्णालयात हलवले. पालकांनीही घटनास्थळी आणि रुग्णालयात धाव घेतली असून, चालक व शाळा व्यवस्थापनावर कठोर कारवाई करण्याची मागणी केली. बहुतांश विद्यार्थ्यांना हात, पाय आणि कोपराला किरकोळ दुखापत झाली असून त्यांची प्रकृती स्थिर असल्याचे डॉक्टरांनी सांगितले.

मात्र, डोक्याला गंभीर दुखापत झालेल्या एका विद्यार्थ्याला पुढील उपचारांसाठी लातूर शहरात हलवण्यात आले, अशी माहिती वैद्यकीय अधिकारी डॉ. संग्राम नरवाते यांनी दिली.नियमित चालकाने शाळा प्रशासनाला कोणतीही पूर्वसूचना न देता दुसऱ्या चालकाकडे बस सोपवून गाव सोडले होते, असा आरोप पालकांनी केला. पर्यायी चालकाचा निष्काळजीपणा आणि अनुभवाचा अभाव यामुळे हा अपघात घडल्याचा दावा त्यांनी केला.