Shree Vighnahar Ganpati – अष्टविनायकांतील प्रमुख स्थान असलेल्या श्री क्षेत्र ओझर येथील श्री विघ्नहर गणपती मंदिरात अंगारिका चतुर्थीनिमित्त भाविकांची मोठी गर्दी झाली. सकाळी ४ वाजल्यापासून रात्री ११ वाजेपर्यंत भाविकांनी मोठ्या संख्येने श्री विघ्नहराचे दर्शन घेतले. दिवसभरात सुमारे एक लाख भाविकांनी श्री विघ्नहराचे दर्शन घेतले.

अंगारिका चतुर्थीनिमित्त पहाटे ४ वाजता श्री विघ्नहर गणपती देवस्थान ट्रस्टचे अध्यक्ष बाळासाहेब कवडे, उपाध्यक्ष तुषार भाऊ कवडे, खजिनदार दत्तात्रय सिताराम कवडे यांच्या शुभहस्ते श्रींना महाअभिषेक व पूजा करण्यात आली. त्यानंतर मंदिर भाविकांसाठी दर्शनास खुले करण्यात आले.

अंगारिका चतुर्थीच्या शुभमुहूर्तावर मंदिरात महाआरती करण्यात आली. महाआरतीचा मान रमेश मांडे, हर्षल केंगले, नानौर रावसाहेब, अभिनय टेमगिरे, रणजित भगत, आनंद करडीले व मनोज भोईर यांना मिळाला.

दिवसभर सकाळी ७ वाजता व दुपारी १२ वाजता मध्यान्ह आरती करण्यात आली. सकाळी ८ वाजता नियमित पोथीवाचन झाले. सकाळी १०.३० वाजता श्रींना नैवेद्य दाखवून देवस्थान ट्रस्टच्या वतीने भाविकांना खिचडी प्रसादाचे वाटप करण्यात आले.

अंगारिका चतुर्थीनिमित्त श्री विघ्नहर मंदिरात फुलांची आकर्षक आरास करण्यात आली होती. श्री विघ्नहराला रेशमी जरीचा पोशाख परिधान करून सोन्याचे अलंकार घालण्यात आले होते.

भाविकांच्या सोयीसाठी देवस्थान ट्रस्टच्या वतीने दर्शनरांग, पिण्याच्या पाण्याची व्यवस्था, अभिषेक व्यवस्था, देणगी कक्ष, शमी वृक्षाखाली अभिषेकाची व्यवस्था, पार्किंग तसेच कमी वेळेत दर्शन घेता यावे यासाठी मुखदर्शनाची व्यवस्था करण्यात आली होती.

सायंकाळी ७ वाजता नियमित हरिपाठ करण्यात आला. त्यानंतर चंद्रोदय रात्री ८.१५ वाजेपर्यंत अंगारिका चतुर्थीनिमित्त कीर्तनकार ह.भ.प. मयूर महाराज बोडके, ओझर यांचे हरिकीर्तन झाले. अंगारिका चतुर्थीचे अन्नदाते रामचंद्र ठमुजी कवडे, ओझर यांच्या वतीने वारकरी व भाविकांसाठी अन्नदान करण्यात आले.

रात्री १०.३० वाजता शेजआरती झाल्यानंतर रात्री ११ वाजता मंदिर बंद करण्यात आले. दिवसभर भाविकांची मोठी गर्दी असतानाही दर्शन व्यवस्था, भाविकांच्या सुविधा आणि गर्दीचे नियोजन श्री विघ्नहर गणपती देवस्थान ट्रस्टचे व्यवस्थापक व कर्मचारी यांनी अत्यंत नियोजनबद्ध पद्धतीने केले.