Ladki Bahin Yojana : महाराष्ट्र शासनाच्या महिला व बालविकास विभागामार्फत राबवली जाणारी ‘मुख्यमंत्री माझी लाडकी बहीण’ योजना राज्यातील पात्र महिलांना दरमहा 1,500 रुपयांची आर्थिक मदत प्रदान करते. या योजनेचा लाभ खऱ्या अर्थाने पात्र महिलांपर्यंत पोहोचावा यासाठी ई-केवायसी (e-KYC) प्रक्रिया अनिवार्य करण्यात आली आहे. महिला व बालविकास विभागाने ई-केवायसी करण्याची मुदत 31 डिसेंबर 2025 पर्यंत वाढवली आहे. तसेच, ई-केवायसी प्रक्रियेदरम्यान पर्याय निवडताना किंवा माहिती भरताना झालेल्या काही त्रुटी दुरुस्त करण्यासाठीही विभागाने वेब पोर्टलवर अंतिम संधी उपलब्ध करून दिली आहे. ई-केवायसीमध्ये सुधारणा : महिला व बालविकास मंत्री आदिती तटकरे यांनी दिलेल्या माहितीनुसार, राज्यातील 1 कोटी 74 लाख महिलांनी ई-केवायसी प्रक्रिया पूर्ण केली आहे. मात्र, काही महिलांकडून प्रक्रिया करताना चुकीची माहिती भरली गेली असल्याचे लक्षात आल्यानंतर, विभागाने ती दुरुस्त करण्याची संधी दिली आहे. त्यामुळे लाभार्थींनी पोर्टलवर लॉगिन करून आवश्यक माहिती काळजीपूर्वक भरून दुरुस्ती करून घ्यावी, असे आवाहन करण्यात आले आहे. महिलांनी ई-केवायसी कसे करावे? ई-केवायसी प्रक्रियेत वडील किंवा पतीच्या आधार क्रमांकाचे प्रमाणीकरण आवश्यक असल्याने, वडील किंवा पती हयात नसलेल्या महिलांसमोर अडचणी निर्माण होत होत्या. यावर सरकारने निर्णय घेत स्पष्ट मार्गदर्शक सूचना दिल्या आहेत. अशा महिलांनी खालीलप्रमाणे प्रक्रिया करावी : वडील / पती हयात नसल्यास – त्यांचे मृत्यू प्रमाणपत्राची प्रत आपल्या अंगणवाडी सेविकांकडे 31 डिसेंबर 2025 पर्यंत जमा करावी. घटस्फोटित महिला – घटस्फोटाचा न्यायालयीन आदेश किंवा घटस्फोट प्रमाणपत्र अंगणवाडीकडे द्यावे. दरम्यान, ही प्रक्रिया पूर्णपणे ऑफलाइन असेल. अशा महिलांनी स्वतःचे ई-केवायसी मात्र ऑनलाइन पूर्ण करणे आवश्यक आहे, म्हणजे स्वतःचा आधार क्रमांक पोर्टलवर नोंदवून प्रमाणीकरण करावे. नोव्हेंबर महिन्याचा हप्ता कधी मिळणार? योजनेच्या लाभार्थी महिलांना नोव्हेंबर महिन्याच्या हप्त्याची रक्कम कधी जमा होणार? याबाबत अद्याप प्रतीक्षा कायम आहे. विभाग लवकरच याबाबत अद्ययावत माहिती जाहीर करेल, अशी अपेक्षा आहे.
