Khushi Mukherjee Big Revelations On Suryakumar Yadav Chat Controversy 100 Crore Defamation Case : बोल्ड फॅशन सेन्समुळे चर्चेत राहणारी अभिनेत्री खुशी मुखर्जीने (Khushi Mukherjee) भारतीय क्रिकेट संघाचा माजी टी-२० कर्णधार सूर्यकुमार यादवसोबतच्या (Suryakumar Yadav) जुन्या चॅट वादावर अखेर मौन सोडले आहे. यापूर्वी सूर्यकुमारवर केलेल्या वक्तव्यामुळे तिच्यावर तब्बल १०० कोटी रुपयांचा मानहानीचा दावा दाखल करण्यात आला होता. आता बिपिन सिंह यांच्या पॉडकास्टमध्ये बोलताना खुशीने अनेक धक्कादायक खुलासे केले आहेत.

खुशी मुखर्जीने स्पष्ट केले की, सूर्यकुमार तिला नक्कीच मेसेज करायचा; मात्र त्यांच्यातील संवाद समोर आल्यानंतर तिचे इन्स्टाग्राम अकाउंट संशयास्पदरीत्या डिलीट झाले, ज्यामागे सूर्यकुमारच्या पीआर (PR) टीमचा हात असल्याचा संशय तिने व्यक्त केला आहे. सूर्यकुमार यादवची प्रतिमा मलीन करण्याचा प्रयत्न करत असल्याचा आरोप करत ट्रोल करणाऱ्यांना खुशीने थेट उत्तर दिले.

‘मी खोटे बोलत नाही, माझ्याकडे पुरावे आहेत’; ट्रोलर्सना खुशीचे सडेतोड उत्तर!

ती म्हणाली, “मी कोणतीही खोटी विधाने केलेली नाहीत. माझ्याकडे आजही त्या सर्व संभाषणांचे (चॅट्स) ठोस पुरावे सुरक्षित आहेत; पण मी ते आजवर सार्वजनिक केलेले नाहीत.” तिने स्पष्ट केले की, हे संभाषण त्या काळातील आहे जेव्हा सूर्यकुमार केवळ आयपीएल (IPL) खेळत होता आणि त्याने भारतीय संघात आंतरराष्ट्रीय पदार्पणही केले नव्हते.

केवळ क्रिकेटवर मैत्रीपूर्ण चर्चा; अकाउंट डिलीट झाल्यावर सुरू केले स्वतःचे अ‍ॅप!

खुशीने पॉडकास्टमध्ये सांगितले की, दोघांमध्ये केवळ मित्रांप्रमाणे सामान्य चर्चा व्हायची, ज्यामध्ये प्रामुख्याने क्रिकेट आणि त्याच्या खेळाचा समावेश असायचा. त्या चर्चेत कोणतीही गैरवर्तणूक नव्हती. इन्स्टाग्राम अकाउंट अचानक डिलीट झाल्यानंतर चाहत्यांशी संवाद साधण्यासाठी आणि उत्पन्नाचे साधन म्हणून तिने स्वतःचे अ‍ॅप सुरू केल्याचे सांगितले. याशिवाय, इतरही अनेक क्रिकेटर्स तिच्या संपर्कात होते आणि काही खेळाडू तिला गाणी गाऊन पाठवायचे, असा दावाही तिने केला.

हेही वाचा – Razaullah Khan Record : नवव्या क्रमांकावर येत ९ षटकार ठोकून नवख्या फलंदाजाने उडवली इंग्लंडची दाणादाण! विश्वविक्रमाची केली बरोबरी

पापाराझींसमोर केलेले विधान अन् १०० कोटींच्या नोटीसने उडालेली खळबळ –

या वादाची सुरुवात एका कार्यक्रमात झाली होती, जिथे तिने आपण कोणत्याही खेळाडूला डेट करत नसून सूर्याचे नाव आपल्याशी जोडू नये असे म्हटले होते. यानंतर प्रकरण थेट कोर्टात पोहोचले आणि १०० कोटींचा मानहानीचा दावा ठोकण्यात आला. कायदेशीर कारवाईचा फास आवळल्यानंतर खुशीने डॅमेज कंट्रोल करत आपले विधान चुकीच्या पद्धतीने मांडल्याचा दावा केला होता. आता पॉडकास्टमधील तिच्या नव्या खुलाशामुळे हा वाद पुन्हा एकदा सोशल मीडियावर पेटला आहे.