Khed Water Scheme – खेड तालुक्यातील जलजीवन मिशनअंतर्गत प्रलंबित असलेल्या पाणीपुरवठा योजनांच्या महावितरण कामांसाठी तब्बल 2 कोटी 71 लाख रुपयांच्या निधीस मंजुरी मिळाली असून, त्यामुळे 28 गावांतील 31 कामांचा मार्ग मोकळा झाला आहे. अशी माहिती आमदार बाबाजी काळे यांनी दिली. या मंजुरीमुळे भोरगिरी, गोसासी, गुळाणी, येणवे बुद्रुक, कोहिनकरवाडी, नायफड (3 कामे), परसूल, साबुर्डी, शेलगाव, शेंदुर्ली, वेताळे, वडगाव तर्फे खेड,

वाकळवाडी (2 कामे), वाळद, वाशेरे, आखरवाडी, अनावळे, आसखेड बुद्रुक, औंढे, गारगोटवाडी, गोरेगाव, कासारी, कोहिंडे खुर्द, पाभे, वाफगाव, वाघु आणि वहागाव येथील पाणीपुरवठा योजनांच्या महावितरण कामांना गती मिळणार आहे. परिणामी ग्रामीण भागातील नागरिकांच्या पिण्याच्या पाण्याच्या समस्येवर मोठ्या प्रमाणात दिलासा मिळण्याची अपेक्षा व्यक्त होत आहे.

आमदार बाबाजी काळे यांनी या प्रश्नाबाबत राज्य विधिमंडळाच्या अधिवेशनात सातत्याने पाठपुरावा करून शासनाचे लक्ष वेधले होते. खेड तालुक्यातील अपूर्ण जलजीवन मिशन कामे, निधीअभावी रखडलेल्या योजना आणि ग्रामीण भागातील पाणीटंचाईचा मुद्दा त्यांनी सभागृहात ठामपणे मांडला होता. तसेच पंचायत समिती स्तरावर आढावा बैठक घेऊन संबंधित अधिकार्‍यांकडून कामांची माहिती घेतली होती.

या पाठपुराव्यास जिल्हाधिकारी जितेंद्र डुडी आणि पुणे जिल्हा परिषदेचे मुख्य कार्यकारी अधिकारी गजानन पाटील यांचे सहकार्य लाभल्याचेही त्यांनी सांगितले. त्यांच्या समन्वयातून आणि आमदार काळे यांच्या सातत्यपूर्ण प्रयत्नांमुळे अखेर या कामांना मंजुरी मिळाली आहे. दरम्यान, मंत्रालयात पाणीपुरवठा व स्वच्छता मंत्री गुलाबराव पाटील यांच्या अध्यक्षतेखाली झालेल्या आढावा बैठकीत राज्यातील जलजीवन मिशन योजनांच्या प्रगतीचा आढावा घेण्यात आला.

यावेळी पुणे जिल्ह्यातील अपूर्ण योजनांचा मुद्दा उपस्थित करून ती तातडीने पूर्ण करण्याची मागणी करण्यात आली होती. खेड तालुक्यातील 28 गावांतील 31 कामांना मंजुरी मिळाल्याने ग्रामीण भागातील हजारो नागरिकांना थेट लाभ होणार असून, पाणीपुरवठा व्यवस्था अधिक सक्षम आणि शाश्वत होण्यास मदत होणार आहे.

“खेड तालुक्यातील ग्रामीण भागातील नागरिकांना शुद्ध व नियमित पिण्याचे पाणी उपलब्ध व्हावे यासाठी जलजीवन मिशनच्या प्रलंबित कामांचा प्रश्न सातत्याने शासन दरबारी मांडला. 31 कामांसाठी 2.71 कोटी रुपयांच्या मंजुरीमुळे अनेक गावांच्या पाणीपुरवठा योजनांना गती मिळणार आहे. उर्वरित कामेही लवकर पूर्ण करण्यासाठी पाठपुरावा सुरू राहील.”
– बाबाजी काळे, आमदार, खेड-आळंदी विधानसभा