Khed News- खेड तालुक्यात पावसाने ओढ दिल्याने खरीप पिकांचे नुकसान झाले असताना रब्बी हंगामासाठी पाणी उपलब्ध व्हावे, यासाठी ओढ्यांवरील बंधार्‍यांमध्ये पाणी अडविण्याच्या कामांना वेग देण्यात आला आहे. पुणे जिल्हा परिषदेच्या लघुपाटबंधारे विभागाच्या माध्यमातून तालुक्यातील 50 गावांमधील 101 बंधार्‍यांपैकी 35 ग्रामपंचायतींच्या अखत्यारीतील 61 बंधार्‍यांचे लोखंडी ढापे बसविण्याचे काम पूर्ण झाले आहे.

त्यामुळे सुमारे 900 हेक्टर शेती रब्बी हंगामात ओलिताखाली येण्याची अपेक्षा असून, उर्वरित बंधार्‍यांमध्येही लवकरच पाणी अडविण्यात येणार आहे, अशी माहिती गटविकास अधिकारी विशाल शिंदे यांनी दिली. खेड पंचायत समितीच्या लघुपाटबंधारे विभागाच्या अखत्यारीत तालुक्यात कोल्हापूर पद्धतीचे, साठवण आणि वळण असे 101 बंधारे आहेत.

त्यापैकी सुमारे 25 बंधारे नादुरुस्त झाले होते, तर काही बंधार्‍यांचे लोखंडी ढापे चोरीला गेल्याने पाणी अडविण्याची क्षमता कमी झाली होती. यंदा पावसाने अपेक्षित साथ न दिल्याने आणि परतीच्या पावसानेही माघार घेतल्याने खरीप हंगामातील पिकांचे नुकसान झाले आहे. या पार्श्वभूमीवर उपलब्ध पाणीसाठा अडवून त्याचा रब्बी पिकांसाठी उपयोग करण्यासाठी प्रशासनाने दुरुस्ती व ढापे बसविण्याच्या कामांना प्राधान्य दिले आहे.

बंधार्‍यांचे लोखंडी ढापे बसविणे आणि पावसाळ्यापूर्वी ते काढणे यासाठी जिल्हा परिषदेने 16 जुलै रोजी तीन कोटी 92 लाख 38 हजार 32 रुपयांच्या अंदाजपत्रकाला मंजुरी दिली. या कामांसाठी एकूण खर्चाच्या 50 टक्के रक्कम ग्रामपंचायतींना वर्ग करण्यात आली असून, उर्वरित 50 टक्के खर्च ग्रामपंचायतींनी स्वनिधीतून करायचा आहे, अशी माहिती उपअभियंता रुपाली तांदळे यांनी दिली.

तालुक्यातील 50 ग्रामपंचायतींच्या अखत्यारीतील बंधार्‍यांसाठी जिल्हा परिषदेने एक कोटी 96 लाख 19 हजार 16 रुपये ग्रामपंचायतींकडे वर्ग केले आहेत. ढापे बसविण्याबरोबरच पावसाळ्यापूर्वी ते काढण्यासाठी ग्रामपंचायतींच्या स्वनिधीतूनही तेवढाच खर्च करण्यास मंजुरी देण्यात आली आहे.

दरम्यान, 35 ग्रामपंचायतींच्या अखत्यारीतील 61 बंधार्‍यांचे ढापे बसविण्याचे काम पूर्ण झाले आहे. आणखी 14 ग्रामपंचायतींच्या हद्दीतील 15 बंधार्‍यांचे ढापे तीन ते चार दिवसांत बसवून पाणी अडविण्यात येणार आहे, अशी माहिती सहाय्यक स्थापत्य अभियंता ज्योती भुसारी यांनी दिली.

गावनिहाय मंजूर निधी
आडगाव – 14,043; आखरवाडी – 9,362; आंबोली – 27,501; औदर – 4,096; काळुस – 81,917; बहुळ – 38,618; विरहाम भलवडी – 59,097; भोरगिरी-भिवेगाव – 76,066; वडगाव घेनंद – 98,300; डेहणे – 18,724; देवोशी – 47,394; मिरजेवाडी-घनवटवाडी – 7,021; घोटवडी – 25,160; जऊळुके बुद्रुक – 17,554; धामणगाव – 19,894; कडुस – 1,59,153;

पाडळी-काळेचीवाडी – 70,799; कळमोडी – 49,150; कमान – 23,405; कनेरसर – 87,768; कान्हेवाडी बुद्रुक – 9,361; खरपुड – 14,043; खरपुडी बुद्रुक – 4,681; कोंहिंडे बुद्रुक – 14,628; कोये – 40,958; कुडे बुद्रुक – 7,021; मरकळ – 7,021; वाशेरे – 7,021; नायफड – 16,383; पापळवाडी – 7,021; पूर – 38,618; रासे – 19,309; साबुर्डी – 11,703; वेताळे – 43,299; वरचे भोमाळे – 19,309;

वरुडे – 1,38,674; वाफगाव – 1,08,248; वांद्रा – 23,405; येणिये खुर्द – 68,459; येणिये बुद्रुक – 27,501; शिरोली – 74,895; आसखेड खुर्द – 52,661; टाकळकरवाडी – 18,724; करंजविहिरे – 45,639; आव्हाट – 5,851; हेद्रुज – 28,086; बहिरवाडी – 14,043; मोरोशी – 4,681; पाळु – 50,320; मांजरेवाडी – 1,05,322.