Khed Tourism – खेड तालुक्याचा पश्चिम पट्टा सध्या निसर्गाच्या मुक्तहस्ते उधळलेल्या सौंदर्याने बहरून गेला आहे. आंबोली, वांद्रा, सुपे सातकरवाडी, कुडे, भोरगिरी आणि भीमाशंकर परिसर हिरवाईच्या शालूने नटला असून, डोंगररांगा, दाट धुके, थंडगार वारा, हिरवीगार भातशेती आणि अधूनमधून बरसणार्‍या पावसाच्या सरींमुळे या भागाचे रूप पालटले आहे.

त्यामुळे पुणे, पिंपरी-चिंचवडसह आसपासच्या शहरांतील पर्यटकांना पश्चिम खेडची भुरळ पडत असून, श्रावणाच्या पार्श्वभूमीवर या भागातील निसर्ग पर्यटनाला चांगलीच चालना मिळाली आहे. यंदा पश्चिम खेड परिसरात झालेल्या दमदार पावसामुळे डोंगर-दर्‍यांमधील निसर्ग खुलला आहे. डोंगर उतारांवर पसरलेली हिरवळ, भातशेतीची डोलणारी पिके,

झाडाझुडपांमधून खळाळत वाहणारे पाण्याचे प्रवाह आणि धुक्याने झाकोळलेल्या डोंगररांगा पर्यटकांचे लक्ष वेधून घेत आहेत. सकाळच्या आणि सायंकाळच्या वेळी दाट धुक्यामुळे परिसराचे विहंगम दृश्य पाहायला मिळत असून, पावसाच्या सरींमुळे वातावरणात आल्हाददायक गारवा निर्माण झाला आहे. यंदाच्या चांगल्या पावसामुळे पश्चिम भागातील नद्या, ओढे आणि नाले पुन्हा दुथडी भरून वाहू लागले आहेत.

डोंगरकड्यांवरून कोसळणारे छोटे-मोठे धबधबे पर्यटकांचे आकर्षण ठरत आहेत. उन्हाळ्यात कोरडे पडलेले जलप्रवाह पावसामुळे जिवंत झाले असून, अनेक ठिकाणी निसर्गाने साकारलेली मनोहारी दृश्ये पाहायला मिळत आहेत. श्रावण महिना सुरू झाल्याने भीमाशंकर, भोरगिरी, वांद्रा आणि आंबोली परिसरात पर्यटकांची वर्दळ वाढू लागली आहे.

धार्मिक पर्यटनासोबतच पावसाळी निसर्ग पर्यटनासाठीही या भागाला विशेष पसंती मिळत आहे. पुणे, पिंपरी-चिंचवड आणि आसपासच्या शहरांमधून सप्ताहअखेर मोठ्या संख्येने पर्यटक या भागात दाखल होत आहेत. हिरवाईने नटलेल्या डोंगररांगा, धुक्याची दुलई आणि धबधबे पर्यटकांसाठी खास आकर्षण ठरत आहेत.