Andharban Trek – पावसाळ्यातील सर्वाधिक लोकप्रिय आणि निसर्गरम्य ट्रेकपैकी एक असलेल्या मुळशी तालुक्यातील प्रसिद्ध ‘अंधारबन’ जंगल ट्रेकला अखेर पुन्हा सुरुवात होत आहे. वनविभागाच्या सशर्त परवानगीनंतर हजारो निसर्गप्रेमींच्या प्रतीक्षेला पूर्णविराम मिळाला असून, 15 ऑगस्ट 2026 पासून हा ट्रेक मर्यादित स्वरूपात पर्यटकांसाठी खुला करण्यात येणार आहे. ऑनलाइन नोंदणीची सुविधा उपलब्ध करून देण्यात आली आहे.

सुधागड वन्यजीव अभयारण्यातील पिंपरी परिमंडळामधील अंधारबन निसर्ग पायवाट दरड कोसळून नुकसानग्रस्त झाली होती. पर्यटकांच्या सुरक्षिततेचा विचार करून हा ट्रेक मार्ग 9 जुलै 2026 पासून बंद ठेवण्यात आला होता. त्यानंतर वनविभागाकडून मार्गाची पाहणी करून आवश्यक सुरक्षा उपाययोजना करण्यात आल्या.

उपवनसंरक्षक (वन्यजीव), ठाणे यांच्या आदेशानुसार अंधारबन चेकपोस्ट, पिंपरी येथून सुरू होणारा 2.2 किलोमीटर अंतराचा एकेरी ट्रेक मार्ग सशर्त परवानगीने पर्यटकांसाठी सुरू करण्यात येणार आहे. मात्र, अंधारबन ट्रेकसाठी इतर कोणत्याही मार्गाने पर्यटकांना प्रवेश दिला जाणार नसल्याचे सुधागड वन्यजीव अभयारण्य प्रशासनाने स्पष्ट केले आहे.

अंधारबन ट्रेक पुन्हा सुरू झाल्याने परिसरातील स्थानिक नागरिकांमध्येही आनंदाचे वातावरण आहे. पर्यटकांची संख्या वाढल्यास स्थानिक मार्गदर्शक, चहा-नाश्ता केंद्रे, भोजन व्यवस्था तसेच वाहनतळ यामधून स्थानिकांना रोजगार व उत्पन्नाच्या संधी उपलब्ध होणार आहेत. त्यामुळे पर्यटनाबरोबरच स्थानिक अर्थव्यवस्थेलाही चालना मिळण्याची अपेक्षा व्यक्त होत आहे.

“पर्यटकांसाठी ऑनलाइन नोंदणीची सुविधा उपलब्ध करून दिली आहे. प्रत्यक्ष ट्रेक मार्ग 15 ऑगस्टपासून सुरू करण्यात येणार आहे. पर्यटकांनी प्रशासनाकडून देण्यात येणार्‍या सर्व सुरक्षा सूचनांचे कटाक्षाने पालन करावे.”
– उ. म. जंगम, वनक्षेत्रपाल सुधागड वन्यजीव अभयारण्य