-नीलेश बाबर
Kharif Crop Damage- वाई तालुक्यात गेल्या काही दिवसांपासून पावसाने दडी मारल्याने खरीप हंगामातील पिकांना पाण्याचा मोठा ताण जाणवू लागला आहे. तालुक्यातील विविध भागांत सोयाबीन, भुईमुगासह हळद व अन्य खरीप पिकांची अवस्था पावसाअभावी चिंताजनक होत असून काही ठिकाणी पिके करपण्यास सुरुवात झाल्याचे चित्र आहे. त्यामुळे शेतकऱ्यांना खरीप हंगाम वाया जाण्याची भीती आहे. खरीप हंगामात शेतकऱ्यांनी मोठ्या अपेक्षेने सोयाबीन व भुईमुगाची लागवड केली.

सुरुवातीच्या काळात झालेल्या पावसामुळे पिकांची उगवण व वाढ चांगली झाली होती. मात्र, मागील काही दिवसांपासून पावसाने अचानक उघडीप दिल्याने जमिनीतील ओलावा झपाट्याने कमी होत आहे. परिणामी पिकांना पाण्याचा ताण सहन करावा लागत असून शेतकऱ्यांचे लक्ष आता आभाळाकडे लागले आहे. सोयाबीन पीक सध्या महत्त्वाच्या वाढीच्या टप्प्यात आहे. काही भागांत पावसाअभावी सोयाबीनची पाने वाळणे,

पिके पिवळसर पडणे आणि वाढ खुंटणे अशी स्थिती आहे. पिकाला योग्य वेळी पाणी न मिळाल्यास शेंगा भरण्यावर आणि अंतिम उत्पादनावर परिणाम होण्याची शक्यता आहे.
भुईमुगाच्या पिकालाही सध्या पावसाची नितांत गरज आहे. जमिनीतील ओलावा कमी झाल्याने काही ठिकाणी भुईमुगाची वाढ प्रभावित होत असून पीक सुकण्याच्या मार्गावर असल्याचे शेतकरी सांगत आहेत.

विशेषतः हलक्या व मुरमाड जमिनीतील पिकांवर पावसाच्या खंडाचा परिणाम अधिक जाणवत आहे. तालुक्यातील काही भागांमध्ये हळदीच्या पिकावरही पावसाच्या खंडाचा परिणाम जाणवत आहे. जमिनीतील ओलावा कमी झाल्याने हळदीच्या वाढीवर परिणाम होण्याची शक्यता असून उत्पादनात घट होण्याची चिंता शेतकऱ्यांना सतावत आहे. हळद पिकासाठी केलेला लागवड खर्च मोठा असल्याने पावसाअभावी नुकसान झाल्यास शेतकऱ्यांवर आर्थिक भार वाढणार आहे.

सोयाबीन, हळद पिकांचे पंचनामे करण्याची मागणी
पावसाच्या खंडामुळे नुकसान होत असलेल्या सोयाबीन व हळद पिकांची कृषी विभाग व महसूल प्रशासनाने प्रत्यक्ष पाहणी करून तातडीने पंचनामे करावेत, अशी मागणी शेतकऱ्यांकडून होत आहे. पिकांचे वस्तुनिष्ठ नुकसान निश्चित करून शासनाच्या नियमांनुसार पात्र शेतकऱ्यांना नुकसानभरपाई अथवा शासकीय मदतीचा लाभ मिळावा, अशी अपेक्षा शेतकरी व्यक्त करीत आहेत.