Illegal Seeds Sale – उरुळी कांचन व शिंदवणे परिसरातील बियाणे, खते व कीटकनाशके विक्रेत्यांच्या मनमानी आणि बेकायदेशीर कारभारावर कृषी विभागाच्या जिल्हास्तरीय भरारी पथकाने धडक कारवाई केली आहे. परवाना निलंबित असतानाही बियाणे विक्री करणार्‍या उरुळी कांचन येथील ’साई शेती भांडार’ तसेच मुदत संपलेल्या परवान्यावर आणि अनधिकृत ठिकाणी खते,

बियाणे व कीटकनाशकांची विक्री करणार्‍या शिंदवणे येथील ’कौशल्या शेती भांडार’ या दोन विक्रेत्यांविरोधात उरुळी कांचन पोलीस ठाण्यात गुन्हे दाखल करण्यात आले आहेत. या कारवाईमुळे हवेली तालुक्यातील बेकायदेशीर कृषी निविष्ठा विक्रेत्यांमध्ये खळबळ उडाली आहे. जिल्हा गुणवत्ता नियंत्रण निरीक्षक धनंजय दिनकर पाटील यांनी दिलेल्या फिर्यादीनुसार,

उरुळी कांचन येथील पुणे-सोलापूर महामार्गावरील पोलीस ठाण्यासमोरील ’साई शेती भांडार’ या दुकानाची 16 जुलै रोजी तपासणी करण्यात आली होती. तपासणीत साठा नोंदवही न ठेवणे, परवान्यात उत्पादक कंपनीचा समावेश नसणे आणि इतर गंभीर त्रुटी आढळून आल्याने जिल्हा अधीक्षक कृषी अधिकार्‍यांनी 22 जुलै रोजी दुकानाचा बियाणे विक्री परवाना 15 दिवसांसाठी निलंबित केला होता. मात्र, निलंबन आदेश धुडकावून दुकान सुरू ठेवण्यात आले.

2 ऑगस्ट रोजी भरारी पथकाने अचानक पाहणी केली असता 28 जुलै ते 2 ऑगस्ट या कालावधीत पालक, मका, काकडी आणि शेपूच्या बियाण्यांची बेकायदेशीर विक्री झाल्याचे बिल नोंदीवरून उघड झाले. याप्रकरणी दुकानाचे मालक बाळासाहेब उल्हास साळुंखे (रा. गुळवंची, ता. जत, जि. सांगली) यांच्याविरोधात बियाणे नियंत्रण आदेश, 1983 तसेच अत्यावश्यक वस्तू अधिनियम, 1955 अंतर्गत गुन्हा दाखल करण्यात आला आहे.

दरम्यान, जिल्हा परिषद कृषी विभागाचे मोहीम अधिकारी विनय दिलीपराव कदम यांनी दिलेल्या फिर्यादीनुसार, शिंदवणे येथील ’कौशल्या शेती भांडार’ येथे 2 ऑगस्ट रोजी तपासणी करण्यात आली. त्यावेळी दुकान चालक पोपट तुकाराम महाडीक यांच्या बियाणे व खत विक्री परवान्याची मुदत 23 नोव्हेंबर 2025 रोजीच संपल्याचे आढळून आले. परवाना नूतनीकरण न करता ते खते व बियाण्यांची विक्री करत होते.

तसेच कीटकनाशक विक्रीचा परवाना एका ठिकाणाचा असताना, दुसर्‍या अनधिकृत ठिकाणी साठवणूक व विक्री सुरू असल्याचेही उघड झाले. शेतकर्‍यांची आर्थिक फसवणूक रोखणे, निकृष्ट व बनावट बियाण्यांचा पुरवठा थांबवणे आणि कृषी क्षेत्राचे नुकसान टाळण्यासाठी शासनाच्या आदेशानुसार ही कारवाई करण्यात आल्याची माहिती कृषी विभागाने दिली. दोन्ही प्रकरणांचा पुढील तपास उरुळी कांचन पोलीस ठाण्याचे प्रभारी पोलीस निरीक्षक महेश विधाते यांच्या मार्गदर्शनाखाली सुरू आहे.